محكمة الأسرة اليوم 2020| يومان رؤية إسبوعيا للجد.. والابن العاق السبب

"عاوز أشوف أحفادي، أنا راجل كبير وطول بتمني يكون ليا أحفاد، بس ابن حرمني منهم"، هكذا وقف جد أمام محكمة الأسرة بروض الفرج ليطالب بحق الرؤية.

وقال الجد فى دعواه أمام محكمة الأسرة بروض الفرج: "عمري ماقصرت فى تربية ابني، ساعدته فى كل حاجة، لحد ما اشتغل وبقي راجل، ولما حان وقت جوازه اشتريت شقة، وعربية ودفعت كل فلوس الجواز من جيبي وجبت الشبكة لمراته، متحلمش بيها، كان ابني الوحيد وعاوز أفرح بيه، بش بعد جوازه نسينا، نسي الناس الناس اللي تعبت وشقيت عشانه، واللي حاولوا يوفروا كل السبل لراحته، وكل ده وكنا بنعذره" .

وتابع الجد فى دعواه أمام محكمة الأسرة بروض الفرج: "مراته من يوم جوازها وهي بتحاول تحط حدود عشان تخلينا أغراب عنهم، ولو روحنا زيارة نقعد كام ساعة وتتحجج بأي حاجة عشان نمشي، ولما خلف أول طفل ليه روحنا نزوره رفضت تخلينا نشوفه ولا نشيله، وقالت عشان الأمراض، فسكتنا رغم إن الموضوع يدايق، وساعتها مراتي سألتني هو إزاى سمح لمراته تكلمنا بالشكل ده، وبعد كده بدأ يخصصلنا يوم نروح نزورهم فيه وقال عشان باقى الأسبوع مشغولين والطفل بيكون فى الحضانة، فقولت ناخده عندنا لحد ماترجعوا من الشغل رفض هو ومراته وقالوا إننا هنفسد الطفل".

وواصل الجد البالغ من العمر ٦٠ عاما، فى دعواه أمام محكمة الأسرة بروض الفرج: "وبعد ٣ سنين خلفوا توأم وبرده نفس المعاناة شفناها تاني، ولما تعب الطفلين فى يوم روحنا نزورهم من غير معاد، مراته رفضت تفتحلنا الباب وطردتنا وساعتها رجعنا البيت وإحنا عنينا مليانة دموع وقهر من ابني".

واستطرد الجد فى دعواه أمام محكمة الأسرة بروض الفرج: "أهل زوجة ابني دايما عندها ودايما أحفادي بيباتوا عندها، وبعد ٦ سنين عقوق ومعاملة قاسية، ابني اتهمني بإني السبب فى المشاكل بينه وبين مراته وطلب مننا نقطع علاقتنا بيه، ومنحاولش نزورهم تاني". .

وقضت محكمة الأسرة بروض الفرج بالدعوى رقم ٦٢٣٧ لعام ٢٠٢٠، بتمكين الجد من رؤية الأطفال يومين إسبوعيا.