محكمة الأسرة اليوم 2020| جوزي سابني عشان عندي سرطان

"سابني عشان عندي سرطان، طيب هو المرض بإيدي ولا بتاع ربنا، عايرني بمرضي بدل مايقف جنبي "، هكذا وقفت الزوجة أمام محكمة الأسرة بالتجمع الخامس تطالب بالخلع من زوجها .

اقرأ أيضًا: النيابة تأمر بعرض طفلة القطامية ضحية تعدي السائق على الطب الشرعى

وقالت الزوجة فى دعواها أمام محكمة الأسرة بالتجمع الخامس: " اتجوزنا من ١٥ سنة، المفروض كنا بنحب بعض، بس للأسف اكتشفت عكس كده، طلع مش بيحبني، وعرفت ده بعد ما صابني الكانسر، واتخلي عني سندي الوحيد فى الدنيا " .

وتابعت الزوجة البالغة من العمر ٣٠ عاما، فى دعواها أمام محكمة الأسرة بالتجمع الخامس: " تقريبا كده طلعت خايبة زي ما أمي كانت بتقولي، أصل لو كنت كويسة، كنت اختارت سند صح، سند يقف جنبي فى مرضي زي ماوقفت جنبه كتير، كنت اختارت سند راجل بجد مش مجرد كلمة فى بطاقة ".

وأضافت الزوجة بدعواها التي تحمل رقم ٨٧٢ لعام ٢٠٢٠، أمام محكمة الأسرة بالتجمع الخامس: " جوزي حافظ كتاب ربنا، بس ميعرفش من رحمة ربنا حاجة، وميعرفش عن تعاليم الدين حاجة غير حقوقه الشرعية، نسي إني كنت زوجة مثالية، كنت مطيعة وعمري ماخالفت كلامه، وانقطعت عن شغلي عشان رافض الإختلاط، مع إنه بيختلط مع الستات فى شغله ".


وواصلت الزوجة فى دعواها أمام محكمة الأسرة بالتجمع الخامس : " قلة أصله شوفتها لما السرطان اتمكن مني، وساعتها أول حاجة قالهالي، أنا هتحوز عشان عاوز حقوقي الشرعية، وإني مستحقش أعيش معاه، وساعتها قولت لنفسي لو إتكتب عليا الموت مش عاوزة أموت في بيته، كفاية اللي ضاع من عمري، وأخدت ولادي وروحت بيت أهلي، منه لله أخدني لحم ورماني عضم " .

ولا تزال الدعوى منظورة إلى الآن تنتظر الحكم.