الدماطي يكشف الخسائر المالية على استثماراته الإعلانية بسبب إلغاء الدوري

كشف محمد الدماطي، عضو مجلس إدارة النادي الأهلي، ومالك شركة "دومتي" إحد الشركات الراعية للدوري المصري الممتاز، بعض الحقائق المترتبة على عدم استكمال الموسم الحالي أو إلغاء أي موسم آخر.

وقال عضو مجلس إدارة الأهلي في تصريحاته عبر صفحته الشخصيةعلى موقع التواصل الاجتماعي "فيسبوك": "الدوري بدأ مع خروجه للقنوات الفضائية، أمثال دريم ومودرن من حوالي 13 سنة، إنه يزيد جدًا كقيمة تسويقية وأصبح مع الوقت مغريا جدًا للشركات المعلنة إنها تركز الدعاية عليه".

وأضاف: "كل ده حصل بشكل متصاعد وزادت الرعاية وحقوق البث لكل الأندية والاتحاد لحين مذبحة بورسعيد في 2012، المشكلة مكنتش بس في إلغاء الموسم لأن ده كان أقل واجب وقتها، إنما المشكلة إن حصل إلغاء للموسم اللي بعده واتعمل دوري مجموعتين بعدها وده أحدث إنهيار في ثقة الشركات المعلنة إن ممكن يبقى في كورة في مصر".

وواصل:" إنهار سعر الرعاية للشركات في الدوري، لأن أي راعي لما بيتفق اتفاق طويل المدى بيكون حاطط خطة تسويق أنه حيتشاف في الفترة الفلانية، فمتقدرش كل شوية تقولو لا حلغي، لحد ما جت شركة بريزنتيشن في 2014، وخدت ريسك قوي جدًا وخطط استثمار جديد و بدأت تبيع للشركات تحت ثقة إن حيبقى في انتظام مستمر بعد كدة".

وأردف:"وفي أول مطب اللي كان في أول موسم في مذبحة الدفاع الجوي، صممت الشركة الراعية على استكمال الموسم بعد توقف حوالي شهرين للأضرار الاقتصادية اللي ممكن تحصل و قد كان ونجحت التجربة، ومن يومها شوفنا كشركات راعية سعر وقيمة الكرة بتزيد موسم ورا التاني والمنظومة كلها استفادت بشكل كبير، وأصبح الدوري مجال إعلان أساسي لمعظم الشركات بعدما انطفأ بريق برامج التوك شو، لدرجة وجود أكثر من 15 راعيا للدوري هذا الموسم على قنوات أون".

واستكمل:" وده بقى يودينا للي بيحصل دلوقتي، إلغاء الدوري وارد ومنطقي وممكن يعدي تسويقيًا بضرر قليل، لو هناك ضمان ١٠٠٪، أن أي دوري جديد حيكمل، ولكن في ظل التأكد من وجود موجة تانية من الكورونا في الشتاء، والله أعلم ممكن تبقى أقوى من الحالية ويكون هناك اضطرار لإلغاء الدوري الجديد".

ووضح:" هنا حيحصل إنهيار لكل القيمة التسويقية للدوري اللي اتبنت بصعوبة على مدار السنين اللي فاتت، والشركات المُعلنة اللي من ضمنهم شركتي مش حتقدر تعتمد على الكورة زي الأول لعدم الاستقرار، بعد ما كانت وسيلة مريحة لينا للوصول للمستهلك، دة غير تأثير الكورونا على ميزانيات الدعاية للشركات اللي لوحده متوقع يعمل تأثير".

وشرح: "الوضع حاليًا صعب والأندية جايز عندها حق إنها عايزة توفر بقية عقود لاعبين والمشكلة مع الشركة الراعية مخلياها برة المعادلة شوية غير اللي حصل في 2015، لكن الواحد من الامانة لازم يتكلم غن الكل لازم يبص لما هو أبعد".

اقرأ ايضًا:" عاجل| كارتيرون يمدد تعاقده مع الزمالك رسميا لموسم إضافي

واختتم: "أي إلغاء آخر سيعني خسائر وانهيارا في حقوق البث والرعاية بأضعاف ما سيتم توفيره بعدم لعب المتبقي من هذا الدوري، كل الدوريات التي تم استكمالها فكرت بنفس المبدأ بعيدًا عن الانتماءات أو مين حيكسب أو يهبط، احنا وصلنا كلنا كمعلنين وأندية واتحاد لمعادلة مربحة أتمني الحفاظ عليها".