بعد هجومها على أبطال ”بـ 100 وش”.. كاملة أبو ذكري: ”انفعلت وكنت قاسية”

ردت المخرجة كاملة أبو ذكري حول هجومها الأخير على أحد أبطال مسلسلها الأخير "بـ 100 وش" ثم تراجعها وحذفها الكلام.

وكشفت عن انفعالها على أبطال مسلسل بـ"100 وش"، مشيرة إلى أنها تحترم موهبتهم وتحبهم وكان سبب ذلك الهجوم خوفها عليهم.

وكتبت كاملة أبو ذكري عبر صفحتها الرسمية بموقع التواصل الاجتماعي "فيسبوك": "أحب اعترف إني انفعلت وكنت قاسية جدًا في كلامي، ولو صدر تصرفات من شخص أو اتنين خلتني أحس بالغضب ده".

وتابعت: "ده ممكن يكون نابع من قلة الخبرة مع التعامل مع جمهور عريض، ومع النجاح الكبير وارد إن أي حد يتعرض للهزة دي، ولو كنت قاسية ده نابع من حبي ليهم وخوفي عليهم، علشان أنا شوفت حجم موهبتهم لما اشتغلت معاهم".

وأضافت مخرجة المسلسل في تصريحها: "وأتمنى إن الشخصين اللي كنت بعنيهم يفهموا كلامي، ويعرفوا إني مستخسرة موهبتهم، وأنا متأكدة إنهم هيفهموني لأنهم الاتنين دول تحديدًا عارفين أنا أد إيه بحبهم وبقدرهم".

وكانت المخرجة كاملة أبو ذكري أثارت جدلًا كبيرًا قبل أيام بعد هجومها على بعض أبطال مسلسل "بـ 100 وش" قائلة: "عرفت وسمعت واتأكدت أن بعض الممثلين المبتدئين من مسلسل بـ100 وش بعد النجاح الفظيع المريع للمسلسل شافوا نفسهم، والغرور سيطر على تصرفاتهم".

اقرأ أيضًا: بعد خسارة جوني ديب القضية.. آمبر هيرد تدعم التصويت بالانتخابات الأمريكية

وأكملت: "عايزة أقولكم خسارة، الغرور مقبرة الفنان زي ما قلنا يوسف شاهين، ده أنتم لسه الناس ما تعرفش أساميكم الحقيقية، وبتشاور عليكم باسم الشخصية اللي قدمتوها، الغرور ممكن يقتلكم، وغرور ليه؟ إنتم مين أصلا؟ كلنا مين أصلا؟".

واختتمت كلامها: "دكتور مجدي يعقوب متواضع ولما تتكلم معاه بيحط راسه في الأرض، مجدي يعقوب بجلالة قدره، وربنا يهدي".