”دي ليلة سودة”.. خالد الجندي يرد على واقعة غريبة حول ”الجن” (فيديو)
رد الشيخ خالد الجندي على فتوى وردته من أحد السائلين، كان محتواها "الدهب بينقص من الخزنة بتاعتي، وفي شيخ قالي إن ده جن متسلط عليا، هل ده صحيح؟".
وأجاب "الجندي" خلال برنامجه "لعلهم يفقهون"، المذاع على قناة "dmc": "ازاي جواب الشيخ اللي قام بالإفتاء إن الجن عنده القدرة على سرقة الأشياء من الناس، دي ليلة سودة، ده معناه إن ربنا سايب كلابها على ديابها، حاشا لله كأن ربنا مش قادر يمنع الجن أنه يسرق الإنس".
وقال الجندي: "طب وليه احنا منسرقش الجن، اشمعنا الجن هو اللي يركبنا، زمان الشيخ محمد الغزالي جاله واحد طويل عريض بيقوله أنا راكبني جن، فقاله أراك طويلًا عريضًا، فلماذا لم تركبه أنت".
اقرأ أيضًا: ”سيول وأمطار”.. الأرصاد تحذر من تقلبات الطقس حتى نهاية الأسبوع.. فيديو
وتابع حديثه: "الشيخ اللي أدلى بالفتوى الغريبة دي بيستدل بقصة أبو هريرة أنه كان حارس لبيت المال ولقى واحد بيسرق فمسكه وقعد يعيط، فراح سايبه تاني يوم مسكه فسابه لأنه قال أنا عندي بيت وعيال ثالث يوم قاله هوديك للنبي مباشرة قاله السارق طب ممكن أقولك على آيه، قاله "الله لا إله إلا هو الحي القوم" إلى أخرها، فأطلقه".
واستكمل: "تاني يوم في الفجر، لقى أبو هريرة بيقوله ماذا فعلت مع أسيرك البارحة، فقال له أشهد أنك رسول الله كيف علمت؟، فقال الرسول صدق وهو كذوب ذاك شيطان"، مستعجبا: "شيطان يبقى بيسرق هو لازم الشيطان يبقى من الجن، الله يقول الوسواس الخناس الذي يوسوس في صدور الناس من الجنة والناس".
واستعجب خالد الجندي قائلًا: "هذا الكلام يحتاج إلى شرح وتحليل، لا يجب أن تسوقوا الحديث لتفهموا الناس أن هذا جن، شوف مين اللي بيسرقك جوه بيتك بدل ما تقول جن بيسرقني".
