عاجل… ”كانت بتبصلي كأني حشرة”.. حفيد كمال الشناوي يروي موقف له مع زوجة هاني شاكر

شارك الفنان الشاب عمر الشناوي متابعيه وجمهوره، بموقف جمعه بزوجة الفنان هاني شاكر، وكتب عبر صفحته بموقع التواصل الاجتماعي فيس بوك قائلًا: "أنا نفسي احكي عن موقف حصلي أثناء ذهابي للأوبرا لاستلام تكريم بالنيابة عن جدي الراحل كمال الشناوي ربنا يرحمه".

وأضاف: "وكان الحفل ده بيكرم فيه الزعيم عادل إمام والفنانه الجميله لبنى عبد العزيز وبيقدم الحفل الفنان هاني شاكر نقيب الموسيقيين.. وقتها كان عمري 21 سنه ولبست بدلتي الوحيدة ورحت وكنت مرعوب بكوني أول مرة يبقي ليا صلة لوحدي بالوسط الفني وناسه دون وجود جدي معي".

وتابع قائلًا: "فقعدت في المكان المخصص لجدي الله يرحمه ومنتظر التكريم يبدأ.. دخلت زوجه الفنان هاني شاكر مصطحبة معها ابنها وصديق له وكان المكان المخصص لهم بجانبي ولكن المشكلة هنا إن كان مخصص لهم كرسيين فقط وهما ثلاثة أشخاص قامت السيدة زوجة الفنان هاني شاكر نادهه الفتاة المسئولة عن تنظيم الجلوس في القاعه وقالت لها مين ده وقاعد هنا ليه".

وأضاف: "البنت وشوشتها في اعتقادي إن ده المكان المخصص لكمال الشناوي أو ده حفيد كمال الشناوي أو حاجة تانية الله أعلم.. قامت قايلة بصوت عالي يقوم.. إحنا ثلاثة هنقعد جنب بعض هنا.. البنت ردت قالت لها ده مكانه وماقدرش أقومه فضلت تردد "يقوم أنا مرات هاني شاكر وهو اللي بيحيي الحفلة".

واستكمل حديثه: "وبتبص لي بصات أكني حشرة قاعدة وفضلت واقفة ومش ناوية تتنازل غير لما أنا اقوم.. البنت ردت عليها قالت لها أنا عندي حل إن حضرتك تقعدي في الصف ده وابنك وصديقه يقعدوا في مكان تاني في الصف الخلفك مباشرا يعني مش بعيد ردت قالت لها "لا هو يقوم احنا هنقعد هنا".

وكتب أيضًا: "أنا كنت محرج جدًا أولا أنا لوحدي ومحدش يعرف أنا مين ولان الناس كلها بدأت تتفرج عليا أكني قاعد في مكان مش مكاني لأن مفيش إنسان هيقوم حد من مكان مخصص له بالجرأه والتعسف ده.. في هذه اللحظة سمعت صوت لطيف جدا وكانت الفنانة لبني عبد العزيز قالت لي تعالي يا حبيبي اقعد جنبي الكرسي ده فاضي فقمت بسرعة لأن كنت عاوز الموقف ده ينتهي والناس تنشغل بحاجة تانية قامت مطبطة عليا وقالت لي متزعلش".

وقال أيضًا: "الموقف ده أثر في نفسيتي جدًا اولا حسيت اني مليش قيمه.. وثانيا حصل في داخلي حاله لخبطه لان وقتها حسيت بكره تجاه زوجه الفنان هاني شاكر وله هو شخصيا وفنه لان كان اعتقادي ان الفن واهله رقي واخلاق واللي حصل معايا ده كان ابعد ما يكون عن مخيلتي لاهل الفن".

اقرأ أيضًا: أبرز تصريحات أحمد فهمي في ”حبر سري”: ”مش من الرجولة اتكلم عن زيجاتي”

واستطرد: "ولكن يشاء القدر إني في نفس الموقف فنانة جميلة  مثل لبني عبد العزيز تعدل الدفه وتوريني ان في كل مكان في دائما الحلو والوحش.. الفن رقي الفن أخلاق، الفن ليس بالبس والمظاهر والتفاخر بل بالسيرة الطيبة وحب الناس ليك ولفنك.. في رأيي الشخصي المتواضع وقف أي فنان لسبب مظهره وأن ده لا يتماشي مع المظهر العام فيه تعسف وغموض".

واختتم كلامه: "لأن من يقرر ما هو المظهر اللائق طالما هو غير معارض لقانون الدوله.. عاجبني أو لا ده مش من حق أي حد لأن الأزواق تختلف.. احتوي الفن ونميه اجتمع بيهم وطور منهم حتي لو بورش من النقابه لتطوير الفن وادعمهم وساعدهم وهنا تبقي فنان بجد وقلبك علي الفن".