شيرين: ندمت على تقديم هذه الأغنية.. والمؤلف يفتح النار عليها
أثارت النجمة شيرين عبد الوهاب الجدل عقب ردها على سؤال وجه لها وهو «ما الأغنية التي ندمتي على تقديمها»، لترد شيرين بأنها ندمت على تقديم أغنية «ماتجرحنيش».
تسبب رد شيرين عبد الوهاب، في غضب الشاعر الكبير بهاء الدين محمد، الذي رد عليها عبر حسابه على «فيسبوك»، وقال: «مش متعود أرد على أي حد، ولكن لما حد يتجاوز حدوده لازم يقف مكانه ويعرف إنه مهما اتعود يغلط لازم ييجي عند بعض الأسماء ويحاسب ويخلي باله وخاصة لما حد في كل كارثة يدافع عنها».
وتابع: «هتكلم باختصار جدًا: المشهد الأول: أول يوم دخلت شيرين عبد الوهاب مكتبي كانت مع الأستاذ نصر محروس اللي هو صاحب الفضل في تقديمها، وبعد دقائق من اللقاء لقينا شيرين بتبكي وسألها نصر بتعيطي ليه ردت علشان أنا قاعدة مع الأستاذ بهاء».
وأضاف: «المشهد الثاني رشحتها تغني كتير بنعشق ولولا موافقة نصر احترامًا للعشرة اللي بنا مكنتش هتغنيها لأنها كانت موقوفة من النقابة».
واستكمل الشاعر بهاء الدين محمد، حديثه وقال: «المشهد الثالث لما فوجئت بمدير أعمالها الرجل اللي أنا بحبه وباحترمه لقيته بيكلمني نيابة عنها ويقولي سمعني الجديد وده طبعًا خطأ لأن اللي بيغني مهما كان اسمه مش المفروض يغلط غلطة زي دي، لأن المشهد ده مش لايق على المشهد الأول».
اقرأ ايضًا.. ندمت على حلاقة شعرها ودافعت عن محمد صلاح.. أبرز إجابات شيرين عبد الوهاب على متابعيها
واختتم بهاء الدين محمد، حديثه عن شيرين عبد الوهاب، وقال: «المشهد الرابع والأخير، أغنية ماتجرحنيش أنا لحد الأن مش عاجبني غُنا شيرين مع إحترامى الكامل لصوتها وأكيد لولا الأستاذ نصر مكنش هيتم اللقاء، وماتجرحنيش من أهم أعمالي ومن حقي أدافع عنها نتاج تهور اللي غنيتها، وكمان لأول مرة ألاقى حد بيحارب نفسه وبيغلط في مبدعين اشتركوا في صناعته، وعشان أكتب الكلام ده يبقى شيرين غلطانة كالعادة بس كان لازم أقولها متعمليش كده تاني وانتى بتكبري بس مش هتعدى حدود حجم بعض الأسماء ولا أعمالهم».
اقرأ أيضا: مواعيد عرض مسلسل «ريفو» والقنوات الناقلة
