رسالة نارية من شوبير لـ الأهلي.. «مش لازم تكسب كل البطولات»
وجه الإعلامي أحمد شوبير، نصيحة لمجلس إدارة النادي الأهلي برئاسة محمود الخطيب، بشأن البرتغالي ريكاردو سواريش المدير الفني للفريق الأول لكرة القدم.
وترددت أنباء عن رحيل سواريش بنهاية الموسم الجاري، بعد تراجع مستوى الفريق في المباريات الأخيرة، وعدم اقناع مجلس الإدارة بقدرات المدير الفني.
وقال شوبير في تصريحات إذاعية عبر برنامج "مع شوبير" المذاع عبر راديو "أون سبورت": "سواريش بدأ اللعب باللاعبين الصغار من مباراة مصر المقاصة، بالإضافة إلى فقدانه عدد كبير من اللاعبين الأساسيين بسبب الراحة".
وتابع: "كانت النتيجة ظهور عدد كبير من اللاعبين المميزين والحكم في الآخر سيكون للجماهير، ومفيش شك إن الأهلي كسب حارس كبير زي مصطفى شوبير، ومحمد فخري وأحمد سيد عبد النبي، ومحمد أشرف ظهير أيسر واعد، أحمد سيد غريب مهاجم واعد، هل هناك خلاف على ذلك".
شوبير: "مش لازم تكسب كل البطولات"
وشدد: "أنت مش لازم تاخد كل البطولات، وأنا معرفش قرار الأهلي إيه، في ناس بتقول الراجل ماشي ومحدش عارف مصيره إيه".
وتابع: "الراجل مش بيلعب معاه، الشناوي، أليو ديانج، ياسر إبراهيم، علي معلول، أفشة، عمرو السولية، وحمدي فتحي وتقريبا مش معاه 20 لاعب، فأنت حضرتك مستعجل في الحكم عليه ليه، أنت خسران دوري خلاص، وموضوع الدوري أصبح منتهي من بدري، لكن إيه المانع أنه يجرب ويتفرج على اللاعبين الشباب".
وأضاف: "ما الأهلي كسب 42 دوري فيها إيه لما يخسر 2، وأنا هتكلم بصراحة يا إدارات الأندية، متحطش ودنك للسوشيال ميديا، حط ودنك للي إنت شايفه، لو شايف أن سواريش مشروع كويس خلاص يكمل".
وأوضح: "الزمالك لو حكم على فيريرا زى ما بيحصل مع سواريش، كان مشي من بدري بعد ما خسر من طلائع الجيش وإنبي، فالمفروض الحكم يتغير".
اقرأ أيضًا: نجم الأهلي يشعل الحرب بين بيراميدز وفيوتشر
واختتم شوبير تصريحاته: "يا إدارة الأهلي شوفوا الدنيا عاملة إزاي لنهاية الموسم، ومتحكموش على المدرب بالنتائج حتى لو خسر المباراتين، شوفوا عمل إيه مع اللاعبين الشباب، فلو سواريش رحل بنهاية الموسم البعض هيقول كان لابد من منحه الفرصة كاملة".
