تامر حسني بعد نجاح حفل الإسكندرية: ”مكنتش حفلة ده كان حدث.. عيني مكنتش بتجيب آخر الجمهور”
حرص الفنان تامرحسني على توجيه الشكر للقائمين على حفل الإسكندرية أمس بعد النجاح الكبير الذي حققه بحضور تخطى النصف مليون، وذلك عبر صفحته على "إنستجرام".
نشر تامر فيديو من الحفل، وعلق عليه: "إسكندرية امبارح مكنتش حفلة عادية ده كان حدث مش عادي، عيني مكنتش عارفة تجيب آخر الجمهور، حضوركم الكريم ده هفضل فخور بيه طول عمري، إتشرفت بتقديمي ل13 موهبة مصرية من مختلف محافظات مصر وفعلًا كسروا الدنيا بأصواتهم الرائعة".
وأضاف: "وعازف الساكس المتميز اللي قدمته وموهبته والجمهور اتفاجئ بموهبته، وفخور بالتنظيم لأستاذ أدهم بكري الشاب الإسكندراني اللي كان بيحبني من 15 سنة وقولتله لو بتحبني لازم تنجح ووعدني إنه أكيد هينجح والنهاردة بقا عنده 30 سنة ومن كبار منظمي حفلات الإسكندرية، ويكون صاحب الحفل الأضخم في تاريخ حفلات مصر، بشكر رجال الأمن على المجهود عظيم في دخول وتأمين عدد خرافي زى دا لحد دلوقتي مفيش أى كاميرات عرفت تصور الجمهور رغم كل الصور دي بس قريب هينزل تقرير كبير عن الحفلة هيكون أوضح إن شاء الله".
واختتم كلامه: "شكرًا طلاب الإسكندرية حبايب قلبي شكرًا لكل شعب إسكندرية العظيم الراقي المحترم شكرًا لكل الوحوش اللي تعبوا في المسرح الكبير ده وإخراج الحفلة بالشكل العظيم ده اللي يليق بإسكندرية وشعبها".
يشار إلى أن الفنان تامر حسني أحيا أمس حفل الإسكندرية في فندق جولدن جويل، إحتفالًا بطلاب الثانوية العامة وشهد الحفل حضور أكثر من نصف مليون.
اقرأ أيضًا .. ”مفيش هرجله”.. أشرف عبد الباقي يكشف عن رأيه بتنظيم الدورة الأولى من مهرجان الدراما «خاص»
