«قتلتوا فرحتهم».. نهاد أبو القمصان تدافع عن طلاب الزي المدرسي «المخطط»

"التيشيرت مخطط أبيض في أسود".. كان الزي المدرسي لأحد المدارس حديث السوشيال ميديا في أول أيام العام الدراسي الجديد، وأخذها بعض النشطاء مادة للسخرية والتنمر، فقد أعادت هذه الصورة إلى أذهان رواد مواقع التواصل الاجتماعي، صورة اللصوص التي كانت تظهر في الأفلام القديمة، الأمر الذي أحدث ضجة على نطاق واسع.

"ده تنمر وتريقة"

وعلقت المحامية نهاد أبو القمصان، رئيسة المركز المصري لحقوق المرأة، على هذا الأمر قائلة: "صور الولاد والبنات في المدارس تفرح وإنهم يرجعوا وينتظموا ويحيوا العلم.. بس لفت نظري صورة منتشرة وعليها تعليقات كلها تنمر.. صورة ولاد في المدرسة الزي بتاع الولاد مخطط بالعرض".

اللبس موجود في المحلات

وتابعت أبو القمصان من خلال فيديو لها على صفحتها الرسمية بموقع التواصل الاجتماعي "فيسبوك": "الناس حاطة الصورة وجمبها صور الحرامية وبيتريقوا عليهم.. إنتوا واخدين بالكم إنكوا مش بتتريقوا على اللي قرر اللبس ده بالرغم إنه عادي وموجود في المحلات".

بتأذوا الأولاد

وأضافت رئيسة المركز المصري لحقوق المرأة: "ممكن علشان العدد كبير وملفت وربما مكنش اختيار موفق.. بس لما نشير الصورة ونتريق عليها بالطريقة دي.. إنتوا مش واخدين بالكم إنكوا بتتنمروا على ولاد في سن ابتدائي وإعدادي.. هتخلوا الولاد يكرهوا اللبس وبتقتلوا فرحتهم وبتأذوهم.. الولاد دول لو قرروا ميروحوش المدرسة ده معناه إن الولاد هيكلفوا أهلهم على الأقل 500 أو 1000 جنيه عشان يغير اللبس ده في الظروف اللي إحنا فيها دي؟.. الناس باعمل جمعيات علشان تدفع مصاريف المدرسة".

اقرأ أيضًا: هل ظاهرة هجوم «البرص المصري» على إسرائيل لها علاقة بالتغيرات المناخية؟

براحة شوية على الطلاب

وواصلت المحامية: "براحة شوية ياجماعة.. مش أي حاجة تستحق الهزار والتريقة.. ومش دايمًا الهزار والتريقة حاجة لطيفة.. في الحالة دي ده تنمر وأذية للولاد وأسرهم.. عندكم مشكلة مع اللي اختار اللبس دي مشكلة نسبية تمامًا.. أنا شايفاهم زي الفل وقمر وحاجة تفرح وتشرف".

اقرأ ايضًا: احتفالا بذكرى أكتوبر.. المنصورة ترفع طائرة حربية في ميدان المحافظة