راندا البحيري: «بيحاولوا يموتوك بالحيا. مبقاش يجيلي دعوة لحضور المهرجانات»
أعربت الفنانة راندا البحيري عن حزنها الشديد من عدم إرسال دعوة لها لحضور المهرجانات الفنية، مشيرة إلى أنها في بدايتها كانت من أوائل الفنانات اللاتي حضرن المهرجانات المصرية.
وكتبت راندا البحيري عبر حسابها الشخصي على موقع التواصل الاجتماعي "فيسبوك": "بحب بلدي وهفضل أحبها، بلدي ماشية في دمي وجوا قلبي، من سنوات وإلى الآن مثلت بطولات وأفلام كتير جدًا، زمان بقى"، مؤكدة: كنت اقرأ دايمًا مانشيت في مُعظم الجرايد والمجلات مكتوب "غياب نجوم السينما عن مهرجان السينما"، وكنت بسمع بوداني إشادة بيا وبكام زميل يتعدوا على صوابع الإيد الواحدة، اللي كنا بنروح سنويًا ندعم مهرجان بلدنا من قلبنا.
وأضافت "البحيري": "الدليل أنه من قلبنا أن مكانش فيه سوشيال ولا ترند ولا حاجة بتحصل ولا بناخد فلوس ولا بناخد شهرة إحنا بس بنروح علشان نقف جنب مهرجان بلدنا اللي كان دايمًا بيتعمل في الأوبرا المصرية".
وأشارت: "على الناحية التانية كان فيه ممثلين مبيروحوش مهرجان بلدهم ده وبيهتموا جدًا بمهرجانات منافسة في بلاد معندهاش سينما بس علشان هياخدوا فلوس كتير لما يروحوا وكانوا بيروحوا جري وكنت برفض علشان بلدي".
يحاولوا يموتوك بالحيا وشايفين أنك خلاص مبقتش موجود
وتابعت راندا: المهرجان ده اللي مبيبعتليش "هو نفسه" كان مدخل أفلامي على هامش المهرجان بتتعرض فيه وكنت مرشحة لأكثر من جائزة، مضيفة: مهرجان الإسكندرية اللي بيتعمل كل سنة من غيري برضه، واخدة منهم جائزة أحسن ممثلة مرتين ومرة من جمعية نقاد الفيلم.
واكملت: يعني مهرجانات شايفاك أحسن ممثل باعترافهم وجائزتهم بيحاولوا يموتوك بالحيا وشايفين أنك خلاص مبقتش موجود أو مش متعرفين بوجودك، مردفة: أنا كمان مش معترفة بوجودكم، وبجد والله من غير ذكر أسماء كان فيه مهرجانات برا بلدي بتتعمل وكنت بغير على مهرجان بلدي وكنت بستني من السنة السنة علشان نحتفل بالسينما وبالشغل، حسبي الله ونعم الوكيل.
