مايان السيد في حوارها لـ «الطريق»: «يسرا ملهمتي بالوسط الفني ونفسي أقدم سيرة فاتن حمامة»
مايان السيد:
بحس إني بنت يسرا ومستحيل أرفض الشغل معاها
دوري في 1000 حمدلله ع السلامة عكس الأدوار المركبة اللي كنت بقدمها
يسرا الملهمة لي بالوسط الفني وعنبة مفاجأة تلقائي وشاب مصري جدع
كررنا مشاهد كتير بسبب الضحك وظهوري خاص في جت سليمة
نفسي اشتغل مع مروان حامد وأقدم سيرة فاتن حمامة
لا أهتم بحجم الدور لكن بحب الأدوار الصعبة المركبة
العدل جروب عيلتي وقلبهم عليا
"يسرا الملهمة لي ومقدرش أقول لها لا".. بهذه الكلمات تحدثت الفنانة مايان السيد عن مشاركته في مسلسل 1000 حمدلله ع السلامة، مع النجمة يسرا ضمن موسم دراما رمضان 2023.
تقدم مايان السيد في مسلسل 1000 حمدلله ع السلامة، ابنة يسرا ضمن الأحداث، ويعد أول عمل كوميدي لها، بعد أن تألقت خلال السنوات الماضية بالأدوار الدرامية الصعبة.
وفي حوارها مع موقع وجريدة "الطريق"، كشفت مايان السيد كواليس وتفاصيل مشاركتها في العمل، ومواقفها مع يسرا بجانب أعمالها الجديدة.
إلى نص الحوار:
*حدثينا عن مشاركتك في مسلسل 1000 حمدلله ع السلامة؟
كلموني شركة العدل جروب وعرضوا عليا أقدم شخصية بنت يسرا في مسلسل 30 حلقة في رمضان وتحمست أوي لأني بحب يسرا وبرتحلها أوي وبحس إني بنتها بجد.
ومينفعش أقولها لا وهي من الناس اللي أحب أشتغل معاها كتير حتى لو الشخصية مكررة.
*كيف حضرتي للهجة؟
شخصية سماح ومامتها وأخوها راجعين من كندا وأول حاجة فكرت فيها وسألت عنها هي اللهجة واللكنة، ولما عرفت إن آدم الشرقاوي أخويا قولت لازم اشتغل على اللهجة وأكسر العربي بتاعي.
مايان السيد مسلسل 1000 حمدلله ع السلامة
*ما الذي جذبك للمشاركة في مسلسل 1000 حمدلله ع السلامة؟
شخصية سماح بنت بتحب السينما ومصر جدًا ولما بتيجي فرصة يسافروا مصر هي الشخص المتحمس وعايزة تشوف المجتمع المصري عامل إزاي.
وعندها حلم تعمل فين وتكون زي يوسف شاهين وتروح مهرجان كان.
وبحب الدور أوي، بيميزه إنه لايت وكوميدي عكس أدواري السابقة الدراما والمعقدة المركبة فكنا حابين نقدم عمل يرسم الضحكة على وشوش الجمهور.
وأنا لا أهتم بحجم الدور ولكن بحب الأدوار الصعبة المركبة.
*تتعاونين مع النجمة يسرا للمرة الثانية.. كيف ترين ذلك؟
كل مرة بتفاجيء قد إيه هي بتحب شغلها مهنية جدًا وبتحب تيجي في ميعادها مبتتأخرش دقيقة ورغم إنها ممكن تكون تعبانة أو مرهقة لكن بتكمل وتلقائية جدًا وتعلمت منها التلقائية.
ويسرا ملهمة لي جدًا في الوسط الفني بحب أسمع منها وأتعلم منها ومن تاريخها الكبير.
مايان السيد تكشف كواليس العمل
*حدثينا عن الكواليس مع باقي أبطال العمل؟
أول مرة اشتغل مع شيماء سيف ومحمد ثروت وبيموتونا من الضحك في التصوير ومشاهد كتير اتعادت أكثر من مرة بسبب التصوير، وشيماء بتساعدني مش بتبخل علينا بالإفيه.
أما عنبة مفاجأة واتفاجئت إنه أول مرة بيمثل قدام كاميرا وتلقائي وطبيعي وبيضحك جدًا ودمه خفيف وعامل شخصية الشاب المصري الجدع صح.
*ماذا عن العمل مع المخرج عمرو صلاح والمنتج جمال العدل؟
المخرج عمرو صلاح هادي جدًا وده أكثر ما يميزه ومبسوطة جدًا بالعمل معه ونفسي اشتغل معاه في الدراما بعد الكوميدي.
العدل جروب بعتبرهم عيلتي وبدأت الشغل معاهم من سنتين في حرب أهلية بحسهم قلبهم عليا وعايزيني أحسن حاجة ويهمهم الناس تضحك من قلبها.
*ما الصعوبات التي واجهتيها خلال العمل؟
البرد من أكتر الصعوبات خلال التصوير مع اللهجة وطريقة إني أكسر العربي وأنا بتكلم.
مايان السيد تتحدث عن يسرا
*ما المواقف التي لا تنسيه بينك وبين النجمة يسرا؟
دايمًا بتنصحني وفي البريك بتقعد تحكيلنا عن ذكرياتها وحكاياتها مع يوسف شاهين وعادل إمام ومواقف وتجارب اتعلمت منها.
*حدثينا عن مشاركتك في مسلسل جت سليمة؟
بشارك بظهور خاص مع دنيا سمير غانم ومتحمسة جدًا للمسلسل ومستنية أشوف الحلقات.
*مَن من المخرجين الذين تودين العمل معهم؟
نفسي اشتغل مع مروان حامد وأحب اشتغل مع عمرو صلاح تاني.
*مَن من نجمات الزمن الجميل تحبين تقديم سيرتها الذاتية؟
بحب جدًا سعاد حسني وفاتن حمامة لكن صعب جدًا تقديم سيرة ذاتية لهم.
