مرتضى منصور: أنا دافع للزمالك 30 مليون جنيه
أكد مرتضى منصور رئيس مجلس إدارة نادي الزمالك، على قيام أبنائه أحمد وأمير، بالتهديد للرحيل عن نادي الزمالك
وقال منصور في تصريحات عبر قناة الزمالك: أبنائى أحمد مرتضى منصور المشرف العام على ألعاب الصالات وأمير مرتضى منصور المشرف العام على الكرة أرادوا الرحيل عن النادي الفتره الماضية.
وتابع: أنا ولادي عاوزين يمشوا خلاص قولتلهم محدش هيمشي غير لما الزمالك يرجع ويقف تاني، عمولات ايه يبني ده أنا دافع 30 مليون للنادي.
وأضاف: المدير الفني الأجنبي الراجل كارلوس ده اللي درب منتخب المكسيك في كاس العالم وخرج المانيا ودرب باراجواي وخد 17 بطولة، احنا بعتناله تذاكر الطيران خلاص، الحمد لله لحد دلوقت متشتمش يعني.
وأكمل: المدير الفني ده بيبقى توفيق من ربنا، ممكن تجيب مدير فني كبير ومكسر الدنيا وميعملش حاجه وممكن تجيب مدرب غلبان ويحقق نجاحات.
وأردف: واللي بيقول الجهاز الفني بتاع العشرين السودا، يبني الناس دي واخدين اكتر من ١٧ بطوله ، مش عبد المنصف ده اللي قلع تيشيرت الاتحاد ولبس تيشيرت الزمالك لما كسبنا الدوري ؟ وأحمد مجدي ده عامل دراسات برة وفاهم شغله أوي ، والراجل جايب معاه المساعد الأسباني بتاعه ، يا جماعه اديلهم فرصه يشتغلوا.
وأوضح: المدير الفني الجديد للزمالك هو سيقرر عدد الراحلين عن الزمالك، الجهاز الفني السابق قد رفع تقرير برحيل أربعه لاعبين عن الزمالك الموسم المقبل بشكل مبدئي.
واختتم: أنا قولت قبل كده إن في ٤ لاعبين هيمشوا، طب أنا بقولك ممكن يبقوا ٨ وممكن يبقول ١٢ كمان، الاربعة اللي قولنا عليهم قبل كده كان في تقرير بيهم من المدير الفني اللي السابق، لكن المدير الفني الجديد ممكن يزود العدد عادي جدا، وممكن برضو ينقص العدد واحنا هننفذ كلامه آخر الموسم.
