عنبة: «نفسي أمثل من زمان.. يسرا أحسن بداية وشيماء سيف وراء ترشيحي»…حوار
عنبة:
"شيماء سيف رشحتني في 1000 حمدلله ع السلامة وضحكت أول ما قرأت الورق
شخصية علي بويكا شبهي بالظبط وأحسن بداية مع يسرا
كان نفسي أمثل من زمان والمخرج عمرو صلاح أخ وساعدني في الإفيهات
اتعرض عليّ أفلام وأعمال كتير رفضتها وحصلت على تصريح نقابة المهن التمثيلية
"أحسن بداية مع يسرا وقلتلها هتبقي وش الخير عليا زي أحمد عز".. بهذه الكلمات بدأ مصطفى عنبة مطرب الراب ومؤدي المهرجانات حديثه، عن أول تجربة درامية له بمسلسل 1000 حمدلله ع السلامة.
كشف مصطفى عنبة في حواره لموقع وجريدة "الطريق"، كواليس وتفاصيل ترشيحه للمشاركة في بطولة مسلسل 1000 حمدلله ع السلامة مع النجمة يسرا، والصعوبات التي واجهته، بجانب أعماله الفنية الجديدة.
إلى نص الحوار:
عنبة مسلسل 1000 حمدلله ع السلامة
*حدثنا عن شخصيتك في المسلسل؟
علي بويكا أجدع راجل هتقابليه وبيساعد مايان السيد اللي باين عليها أجنبية.
*كيف ترى أول تجربة تمثيل لك وكيف حضرت لها؟
حسيت إن شخصية علي هي أنا مش مختلفة عني وأنا لو في موقفه هساعد أي حد محتاج مساعدة.
وأنا عندي موهبة التمثيل وكان نفسي أمثل من زمان ولازم ابتدي صح ومفيش أحسن من إني أبتدي مع يسرا.
اتعرض عليا أفلام وأعمال كتير ورفضتها لأنهم كانوا عايزيني أظهر بنفس شخصيتي ومش مختلف، وحصلت على تصريح من نقابة المهن التمثيلية.
عنبة ويسرا
*كيف جاء ترشيحك لمسلسل 1000 حمدلله ع السلامة؟
أول مرة أمثل كان في مسرحية في السعودية مع بيومي فؤاد وشيماء سيف اللي رشحتني للدور في 1000 حمدلله ع السلامة.
وأول ما قرأت أول حلقة ضحكت واتبسطت من دور ابن البلد وكلهم كانوا بيضيفوا لي.
*وماذا عن ظهورك مع الفنانة يسرا وما هي نصيحتها لك؟
يسرا جدعة وطيبة وهي صاحبتنا بتحب شغلها وتحببنا في الشغل وطاقة الشغل ودعوة أمي استجابت إني ابدأ مع يسرا في التمثيل.
يسرا بتدعم الوجوه الجديدة والشباب وبتحب تظهر كل ممثل، وهي من الناس اللي حببتني في التمثيل وبتقولنا نجاحكم من نجاحي.
*ماذا عن تعاونك مع أبطال العمل والمخرج عمرو صلاح؟
مبسوط جدا بالعمل مع كل أبطال المسلسل شيماء سيف ومحمد ثروت أحسن ناس بتعمل كوميدي ومايان السيد وآدم الشرقاوي بيقدموا شخصياتهم حلو أوي.
مش كل المخرجين كويسين في الكواليس لكن عمرو صلاح بيتعامل معانا أخ وبيساعدني كتير في الكواليس والإفيهات.
مصطفى عنبة مطرب الراب ومؤدي المهرجانات
*هل تقدم أغاني ضمن أحداث مسلسل ألف حمدلله ع السلامة؟
بقدم الأغنية الدعائية للمسلسل.
*ماذا عن معاييرك خلال الفترة المقبلة؟
قلت ليسرا إنك هتكوني وش الخير عليا في اللي جاي زي ما أحمد عز قالها.
مش هختار أي أعمال هختار الأعمال الجديدة اللي تعليني وتقدمني بشكل مختلف.
