جوري بكر: «جوزي بدأ يخاف مني بعد دور وداد في جعفر العمدة»

علقت الفنانة جوري بكر، الشهيرة بدور "وداد"، على مشهد "الفرح" في المسلسل الرمضاني "جعفر العمدة"، قائلة: "يا نهار أسود، أنا كنت خايفة أعدى في المشهد وأروح أقف مع الأستاذة هالة صدقي، من كتر ما كانت مصدقة المشهد بجد وكلهم كارهني بمنة فضالي ومس كساب وإيمان العاصي، لأنهم انضربوا كتير وجامد ووقعوا على الأرض واتبهدلوا بسببي".

وأضافت جوري بكر، خلال استضافتها في برنامج "واحد من الناس"، الذي يقدمه الإعلامي عمرو الليثي عبر فضائية "الحياة": "أنا تتجوزت وسافرت علطول بعد انتهاء أعمال تصوير المسلسل، وأنا عروسة بقالي 4 أسابيع، اتجوزت شاب مصري مولود وعايش في قطر، وبيشتغل في شركة IT، بعد ما حبينا بعض بتاع سنة كده"، متابعة: "زوجي حب المسلسل جدا بس مش عارفة الموضوع هيكمل على إيه، لأنه ابتدى يخاف مني بعد مشاكرتها في المسلسل وتأدية دور وداد، وخاصة مشهد الفرح".

وأردفت جوري بكر: "زوجي قالي أنا خايف تعملي كده فيا في يوم من الأيام يا وداد، وربنا يستر عليه"، ثم انفجرت في نوبة من الضحك.