عمرو سلامة: بحس بالذنب تجاه الأطفال اللي برشحهم للتمثيل وبخاف مستقبلهم يدمر
تحدث المخرج عمرو سلامة، عن كيفية اختياره الأطفال في أعماله واكتشافه لهم، مشيرًا إلى أنه يشعر بالذنب تجاههم لتقديمهم في هذا المجال.
وقال عمرو سلامة في لقاء تلفزيوني: بشوف أطفال كتير وباختار اللي بحس انه عنده الموهبة، ويكون قدامي اختيارات متنوعة، ووخلال الاختيار طفل لفيلم لامؤاخذة التصفيات وصلتني لـ أحمد داش ومعاه طفل تاني، ووضعتهم في اختبارات كتير لحد ما استقريت على داش، وعادة بتعامل مع الأطفال في التصوير على إنهم شخصيات ناضجة ومش بطبطب عليهم، وشايف إن الوسيلة دي بتنفع جدا في الشغل.
وأشار إلى أنه لم يكن يتوقع الاستمرارية لـ أحمد داش وعمر شريف، ولكنهما قررا أن يكملا المسيرة: رأينا أطفال كتير بتبدأ وهي صغيرة وبتكون كويسة جدا بس مش بتكمل لما بتكبر شوية، لذلك الأمر بشكل كبير بيعتمد على المجهود الشخصي لكل ممثل فيهم، واللي حصل إن عمر شريف وأحمد داش كان عندهم الرغبة إنهم يكملوا مسيرة التمثيل، وموقفوش عند نجاح لامؤاخذة وبرة المنهج.
اقرأ أيضًا: عمرو سلامة يُعلن بدء تصوير فيلمه الجديد 60 جنيه.. تفاصيل
واستكمل عمرو سلامة: بشعر بالقلق تجاه الأطفال اللي بقدمها للتمثيل، وببقى حاسس إني عملت فيهم مصيبة، لأني إديتهم فرصة يظهروا كممثلين وفي أدوار بطولة، وبشعر بالخوف إن حياة الطفل ده بعد 10 سنين تتدمر بسببي، لذلك بحب أتناقش مع أهل كل طفل، وأقولهم يتأكدوا من قرارهم.
