بعد اتهامه له بمهاجمة النجاح.. الملحن محمد رحيم يرد بقوة على رامي صبري

رد الملحن محمد رحيم على المطرب رامي صبري بعدما اتهمه بأنه يهاجم النجاح خلال لقائه عبر محطة إذاعية الساعات الماضية، وذلك عن طريق كتابته منشور عبر حسابه الشخصي، بموقع فيسبوك.

وقال محمد رحيم للمطرب رامي صبري خلال المنشور: ردي على صديقي الفنان الكبير رامي صبري بعد اتهامه ليا في وسائل الإعلام إني بهاجم النجاح مع كل الحب والتقدير، أولا يعلم الله سبحانه وتعالى إني معنديش أدنى وقت أضيعه في إني أدخل في أي مواضيع نظرا لانشغالي بمجموعة أعمال مهمة جدا إن شاء الله الناس هتشوفها قربب.

وتابع: تعليقا على مشكلتك أنت وعمرو مصطفى اللي الحمد لله اتحلت في مداخلة إذاعية، وربنا مايجيبش زعل أبدا بين الأخوات، ولكن للأسف اللي حصل أن اسمي تم إقحامه من طرفك بشكل لا يليق ونظرا لأن المداخله كانت على إذاعة مشهورة فطبعا اتسمعت من بعض أفراد عائلتي ومنهم بنتي، وأكيد قطاع كبير من جمهوري اللى بيحبني وبيحترمني وبيحب أعمالي، فوجب إني أرد عليك بكل حب واحترام علشان أوضح، وأصحح المغالطات اللى حصلت في المداخلة، أنت قلت في المداخلة بالنص إنك سنة 2013 هاجمتني بنفسك علشان أنا كنت بحارب النجاح.

وأضاف: كان أخويا الفنان عمرو مصطفى حققه وقت ماقدم أغنية بشرة خير، وكأن أنا راجل معنديش حاجة أعملها غير إني أهاجم وأحارب الناس الناجحين، وأنت اللى وقفت في وشي، وده طبعا كلام مغلوط ومسئ، ولازم أصححه وأبين للناس الحقيقه اللي سكتت عنها سنين احتراما للعشرة الطويلة والصداقة اللي بتجمعنا كلنا، أولا اناا الحمد لله مش ناقص نجاح وتاريخ بفضل الله سبحانه وتعالى علشان أهاجم أي حد ناجح، ربنا يعلم أني بدعي في صلاتي بالرزق والتوفيق لكل الناس وبتمنى الخير للجميع، اللي حصل ساعتها إني علقت أن لحن بشره خير شبيه إلى حد التطابق لعملين من أعمالي.

محمد رحيم يدافع عن نفسه

وأردف محمد رحيم في المنشور: الجمهور هيتفاجئ أنا إزاي سكتت طول السنين دي، والإجابة لأني إنسان مسالم، ومحترم، وعمري ما أسمح لنفسي أرفع قضية على زميل وأخ ومؤمن بتوارد الخواطر وحسن النية دائما، وطبعا دي مش دعوة مني للتخلي عن الحقوق، ولكن العشره الطيبة والمحبة والصداقة ليها علينا حق.

واستكمل: أنت اللى زعلان وبتتهمني إني كنت بهاجم النجاح، أنا قطعا مش بهاجم النجاح، لأنني والحمد لله صديق النجاح.

وأضاف: أنا فقط كنت بعلق على استحياء وخجل على ظاهرة سلبيه جدا، ومتكررة في أسلوب العمل في الوسط الفني، وهي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين.

واختتم: أنا عايز بعد تجربتك الأخيرة مع عمرو اللي سببت المشكلة دي كلها الناس تحاول تتخيل، أنا ساكت على إيه بقالي سنين، ولكن بعد الاعتداء على أعمالي وأفكاري ومجهودي ثم سكوتي وصمتي أطلع بحارب النجاح كمان وكمان أطلع مش عاجب.

اقرأ أيضًا: رامي صبري يعلن وصول أغنية «يمكن خير» إلى 120 مليون