الفن

بعد حوارها مع أحمد رمزي.. هل تسببت جملة «ياختي عليه» في طلاق ليلى رستم؟

الخميس، 28 سبتمبر 2023 09:22 مـ بتوقيت القاهرة

وصل أحمد رمزي إلى النجومية، وبات واحدا من نجوم الشباك في الستنينات، ما دفع المذيعة ليلى رستم إلى استضافته في إحدى حلقات برنامجها "نجمك المفضل".

لم يكن اللقاء عاديا، فبعد أن جلس "رمزي" بجانبها كان يرتدى قميصا فتح معظم "أزراره" إلى الأسفل، ليكشف عن سلسلة بها خرزة زرقاء لفتت انتباه ليلى رستم.

سألته المذيعة عن سر فتح القميص فقاطعها، وقال "أنا مش عارف إيه حكاية القميص ده زرار من فوق وزرار من تحت وكل شوية واحد يكتب لي حاجة فيها إيه دي؟"وردت "أنت مش شايف أنها حاجة غريبة شوية والسلسلة كمان" فرد "السلسلة حاجة شخصية فيها خرزة زرقا علشان العين أنا مابصدقش في العين بس بخاف" فقالت له "يعني حطيت خرزة زرقا عشان الناس ماتحسدكش ليرد "آه وهو بيني وبينك مش أنا اللي حاطتها" فسألته"سر يعني؟ فرد "لا مش سر المدام اديتهالي علشان خايفة عليا" وبدأ في الضحك فردت عليه بجملة "ياختي عليه".

لم تمر جملة "ياختي عليه" مرور الكرام على الرغم من مرور سنوات على الحوار، وبالتزامن مع ذكرى ميلاد أو وفاة أحمد رمزي يتم تداول الفيديو على مواقع التواصل الاجتماعي مصحوبا بلغطً كبير وتعليقات أعلى الفيديو بأنه تسبب في طلاق ليلى رستم من زوجها بعد حوارها مع أحمد رمزي معتبرين جملة "ياختي عليه" مغازلة منها لـ"الولد الشقي".

وفي حوارها مع مفيد فوزي في برنامج "مفاتيح" كشفت ليلى رستم حقيقة الجملة، وقالت إن أحمد رمزي بمجرد وصوله قال إن وجوده في الاستديو يضيع على المنتج الذي يعمل معه فلوسه ووقته، وقالت "يعني إحنا تضييع وقت".

وأضافت: "مش عارفة إيه اللي جاب حكاية ياختي عليه دي هو فرحان بنفسه زي طفل، ونجح في الامتحان وفي الحقيقة استغربت هو ليه فرحان أوي كده علشان قعد في الاستديو ولا علشان بقى نجم، طب ما فيه نجوم كتير بيجولنا وماحدش بيحملنا الجمايل دي كلها، وابتديت أضحك معاه شوية".

وتابعت: "قولتله إيه حكاية السلاسل اللي أنت حاططها دي، سلاسل غير طبيعية ماكنتش الحاجات دى بتحصل زمان وفاتح زراير القميص وكنت بقولها بنوع من التهكم وهو ده اللي ضايقه، قالي دي هدايا جاتلي من ناس أعرفهم، وفيه خرزة رزقا كمان وبقوله انت خايف من الحسد ولا إيه قالي لا مش انا دي بس مراتي اللي حطاها خايفة عليا فقولتله ياختي عليه".

وأردفت:"إحنا في التقاليد بتاعتنا لما يتولد طفل بنحط له الخرزة الزرقا علشان مايتحسدش وأنا كنت شايفة انه طفل ما شاء الله عنده 27 سنة، والطفولة مش عيب يعني، وبلغني إنه قال كلام مش لطيف أنا ماسمعتوش بس بلغني والناس دايما تبلغ الحاجات الوحشة ولو كان قال حاجات كويسة ماكنوش كلموني".

ونفت إيمان الكرداني ابنة المذيعة ليلى رستم الكلام المتداول عن طلاق والدتها بعد حوارها مع "رمزي" خلال لقاء لها ببرنامج "الستات مايعرفوش يكدبوا" وقالت "الحوار كان سنة 1962 ووالدي ووالدتي انفصلوا في 1970، بخلاف أن والدي والفنان أحمد رمزي كانت تجمع بينهما صداقة ودعاه والدي أكثر من مرة على العشاء وبعد حواره مع والدتي، أما عن الجملة فهي قالتها بطريقة عفوية".