شاهد| خبير التنمية الذاتية محمد التهامي: ”لو مفيش في جيبي 2 جنيه ممكن أعيش في دهب”
قال خبير التنمية الذاتية محمد التهامي إن واحدة من أكبر مشاكل فقدان الشغف في هذا الجيل هي الاستسلام للواقع والقبول المطلق بظروف مفروضة، مؤكدًا أن "أخطر حاجة ممكن يمر بيها الإنسان هي الجري بكل طاقته ناحية هدف، والهدف كل شوية يبعد، لحد ما الطاقة تخلص والشغف ينهار".
وأوضح التهامي خلال ظهوره في برنامج "الستات ما يعرفوش يكدبوا "، الذي يعرض على قناة "CBC"، أن "الإنسان ممكن يخلق لحياته اختيار جديد حتى وسط الظروف، مش لازم دايمًا نعيش باللي اتفرض علينا. أنا شخصيًا كنت مهندس واتخرجت من كلية الهندسة، وقعدت 10 سنين بحط هدف في بداية كل سنة إني أسيب شغل الهندسة وأشتغل بالحاجة اللي بحبها، لحد ما بدأت أكتب أول كتاب، وبقى من الأكثر مبيعًا".
وأضاف: "كنت بشتغل من 9 لـ5 علشان أكل عيشي، لكن من 5 لـ9 ببني حلمي، وده اللي خلاني مستحيل أوقف، لأن لو وقفت هرجع للصفر، مش هلاقي حاجة أرجع أعيش بيها روحي".
وفي تعليقه على واقع الحياة والضغوط الاقتصادية، قال التهامي: "أنا لو مفيش في جيبي 2 جنيه على بعض ممكن أعيش في دهب دي منطقة فيها سحر، فيها حاجة غريبة محدش فاهمها لحد دلوقتي والعيشة هناك ببساطة بتفكرنا إننا نقدر نعيش ونحلم حتى بالقليل".
وأشار إلى أن "أحد أهم أسباب توقف الناس عن الحلم هو التنمر على مفاهيم التنمية البشرية، وطرحها بشكل ساخر، فبقينا نسخر من الإيجابية ومن أي حد بيقول: أنا عندي حلم".
وختم بقوله: "على رأي منير.. بطلنا نحلم، الكلمة دي بقيت مفتاح في حياتي، وكل شخص شفته ناجح كان لسه بيحلم، أو عنده حلم بيجري وراه".
