”كلامي هيزعل ناس كتير”.. مريم ناعوم تقترح إيقاف مسلسلات رمضان لمواجهة كورونا

طالبت المؤلفة مريم ناعوم، بإيقاف تصوير كافة الأعمال الدرامية المقرر عرضها في الموسم الرمضاني المقبل، في إطار الإجراءات الوقاية للحد من انتشار فيروس كورونا.

 

وفي تدوينة لها عبر موقع التواصل الإجتماعي "فيس بوك" قالت: "أنا عارفة إن اللي هقوله ده هيزعل ناس كتير، ومنهم فريق عمل مسلسلنا لرمضان، بس اللهم قد بلغت، كل التصوير لازم يقف ١٥ يوم "مع دفع جزء من الأجر للعمال"، نوقف لغاية اول اسبوع في ابريل".

 

وأضافت "يعني هيبقى فاضل أسبوعين تصوير على بداية رمضان، و٣ أسابيع تصوير داخل رمضان، أعتقد المسلسلات كلها ممكن تتقفل ١٥ حلقة خلال ال ٥ أسابيع تصوير دول، الناس اللي بدأت بدري تقفل أول ١٥ حلقة وتعرض النص الأول من رمضان.. وتكمل تصوير عادي عشان الدنيا ماتفرطش منهم وال ١٥ حلقة التانيين يتعرضوا ما بين العيدين، والناس اللي بدأت متأخر تعرض النص الثاني من رمضان، وبرضه تكمل تصوير وتعرض بعد رمضان برضه".

 

وتابعت: "ده معناه إن التصوير يقف اسبوع العيد بس ونكمل تصوير عادي عشان نقلل الضرر على جهات الانتاج لإن في ديكورات مبنية وتفاصيل لوچيستية كتيرة جدا بتزود الخسارة لو الوقفة طويلة، وفي نفس الوقت كل المسلسلات يتعرض منها ١٥ حلقة، فمحدش يتضر ضرر كامل، ونحمي الكرو والفنانين والفنيين والعمال لإن لو حد لا قدر الله عيي في أي مسلسل ده بيهدد المسلسل إنه يتوقف تماماً".

 

وأكملت "مريم" مقترحها قائلة "لو المنتجين اجتمعوا بالقنوات وكل مسلسل قال هو مصور قد ايه وفاضل له قد ايه عشان يقفل ١٥ حلقة أكيد هيقدروا يتوصلوا لخريطة عرض منطقية تحافظ على شغل الجميع لإن هنا المصلحة العامة أصبحت مصلحة خاصة، أنا شخصياً أقدر أعزل نفسي لإني ممكن أشتغل من البيت.. لكن في أفراد صناعة كاملة مطلوب منهم ينزلوا يصوروا كل يوم وسط أعداد كبيرة جداً ومجاميع وأماكن محدش عارف مدى نظافتها.

 

واختتمت حديثها قائلة: "أرجوكم نختار معاركنا، نتحكم في حجم خسارتنا بإيدينا بدل ما الخسارة هي اللي تتحكم فينا".

 

يذكر أن مصر سجلت، أمس 46 حالة إصابة جديدة بفيروس كورونا المستجد، ليرتفع عدد المصابين الإجمالي لـ256 إصابة مؤكدة بالفيروس، فيما ارتفعت الوفيات إلى 7 بعد تسجيل وفاة مواطن في الجيزة.