ميدو يوجه رسائل نارية للاعب الأهلي: الكذب العلني غباء
شن أحمد حسام ميدو لاعب نادي الزمالك ومنتخب مصر السابق، هجومًا عنيفًا على أحمد السيد لاعب الأهلي السابق، بعدما صرح الأخير برفضه الانتقال للقلعة البيضاء مرتين.
وكتب "ميدو" عبر حسابه الرسمي على موقع التدوينات القصيرة "تويتر": "كمية لاعيبه كورة سابقين طلعوا كذبوا شوية كذب الفترة اللي فاتت في التليفزيون، كأن الناس جالها الزهايمر أو يوتيوب وجوجل اتحذفوا".
وتابع: "أرجو من السادة المقدمين لما يلاقوا حد بجح أوي وبيكذب عيني عينك انهم يحرجوه بكلامه القديم والفيديوهات، مش عيب على فكرة العيب انك تبقى عارف انه كذاب والمشاهد عارف انه كذاب وتعدي الموضوع علشان الراجل جدع وجالك ضيف، أو فريق الإعداد مش عايز يحرجه".
وواصل لاعب الزمالك السابق: "اللاعيبة قالت أي كلام وأنا بصحى أشوف وعادي مابفتحش بوقي، لكن بصراحة انفجرت دلوقتي لما قريت أن أحمد السيد قال أن الزمالك فاوضه مرتين وهو رفض".
مضيفًا: "اللاعيبه مابتفرقش ما بين أن وكيل عرض عليك وما بين أن النادي عرض عليك رسميا، شغلة الوكيل انه يحاول ويحاول يمكن الموضوع يمشي ويبتدي يشبطك معاه لحد ما يوديك المكان اللي هو عاوزه لو قدر".
وأكمل: "من حق أي حد يقول رأيه في أي حد لكن الكذب العلني ده خاصة مع التكنولوجيا الحديثة غباء اجتماعي كبير جدا، وتاني بقول إن عيب في حق أي مقدم يبقا عارف ان اللي مستضيفه بيكذب ومعاه دلائل انه كذاب ومايقولوش حاجه، برضوا ده غباء لإنك بتفقد قيمتك الحقيقية كمحاور".
اقرأ أيضًا: الحضري: الأهلي مثل برشلونة وريال مدريد في حصد البطولات
واختتم "ميدو" حديثه: "على فكرة أنا بهزر في موضوع أحمد السيد، أحمد كان لاعيب كويس جدا ومجتهد ومخلص ودمه خفيف جدا من الذ اللاعيبه اللي لعبت معاها في حياتي".
