بنت سوء الحظ والقِسمة الغلط!

يا موزّعين الصبر نسيتوني

واقفة لكم هنا من بدري

فاتحة كفوفي العيَّلة وبجري

ناولوني

أنا بنت سوء الحظ والقِسمة الغلط

تلات بنات يتامى

ماشيين ننقَّط ع البشر همِّنا

هتبُص في وش أصغر عيَّلة فينا تعيش

وتبُص في عيون أمِنا تنكسر تبكي

ابكي كمان

اصرُخ وماتخبيش ...

احنا اللي كل ما نشتري خاطر الدنيا

تكسر دماغنا حتتين

واحنا اللي كل ما بنحاول

يطلع لنا اليأس بنيابه السخيفة يُعضنا

نقطع قماشة من كمامنا نلف بيها الجرح كله من سكات

من غير عياط

من غير ما حد يشوفنا يشمت ويعايرنا

يا لوحدكو يا اللي أبوكو مات

بنصحى الصبح نغسل قلبنا الغلبان بمية ساقعة

ننزل نحارب في الشوارع على أكل عيشنا بقلب ساقع

ووش ساقع

وكف ساقع

مايدفاش غير كل أول شهر

مع كل قبض

بتصحى الإنسانية في دمنا

وبنرمي كل همِّنا في البحر

الناس بتشوي قلبنا بمزاج

عملونا ساندوتشات

القطمة دي مُرّة عشان مني

القطمة دي طيبة عشان من نور

آدى اللي باقي لابويا في الدنيا

احنا واحنا ويأسنا السُكر

وآدي اللي فاضل لينا من ريحته

أربع حيطان متجمدين في السقف

لو اتفكوا نحقق حلمنا.. لكن ننفرط

وإن فضلوا زي ما همّا على حالهم

نفضل نحارب كل يوم

لحد آخر الشهر

يا دي الحقيقة المُرة في لساني

يا دي الظروف المٌغرية للهروب

أو الانتحار

واقفة على

أعلى رفوف حريتي

علشان أسلِّم عقلي مُفتاح الاختيار ...