محمد السيد: سعيت كثيرًا للوجود في الأولمبياد وفخور بادائي
أكد محمد السيد لاعب منتخب مصر للسلاح المشارك في أولمبياد طوكيو سعادته باداءه في دورة الألعاب الأولمبية بالرغم من خروجه من دور الثمانية.
وقال السيد في بيان كتبه عبر حسابه الشخصي بموقع التواصل الاجتماعي "فيس بوك": "بسم الله الرحمن الرحيم ( وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى ) صدق الله العظيم
انا سعيت كتير عشان ابقي هنا والحمدلله وصلت والحمدلله ربنا كرمني بالنتيجة دي اكيد كان نفسي فنتيجة احسن بس انا راضي ومش مستعجل عشان دائما ربنا شايل حاجة احسن
الطريق في البطولة كان صعب بس بتوفيق ربنا ودعائكوا المشوار بقي اسهل كتير
اني العب في أولمبياد طوكيو كان حلم كبير بالنسبالي بس كان علي تكة و يكمل بدخولي المربع الذهبي بس انا راضي اني اكون من اقوي ٨ لاعيبة في العالم مش عشان خسرت لا لكن عشان انا استحق اني اكون هنا الحمدلله استفدت من التجربة والخبرة دي…لسه المشوار طويل
مع تشجعكوا وثقتوا فيا وفي ربنا دائما مديني قوة
احب اشكر الاتحاد المصري للسلاح علي الاعداد الكامل والتجهيزات المخططة جيدا للاعبين استعدادا للاوليمبياد
واشكر عيلتي الدائما واقفه جمبي وبتشجعني انا من غيركم معرفش اعمل حاجة و طبعا مدربيني سواء في المنتخب او بشكل خاص واصحابي و زملائي حتي مدرسيني شكرا ليكوا
الفترة دي خلصت والموسم خلص بعد مشوار صعب طويل بس الانجازات لسه مخلصتش
شكرا علي كل رسائل الدعم الكتير بس بصراحة مش قادر امسك نفسي اكتر من كده اليوم كان طويل وصعب لازم انام
ان شاء الله بكرة نتائج احسن تتحقق وفي بقيت الايام.
الحمدلله حتي يبلغ الحمد منتهاه".
