أحمد الجندي صاحب فضية طوكيو 2020 يشكو «سوء المعاملة» في ستاد القاهرة
كشف أحمد الجندي المتوج بالميدالية الفضية في الخماسي الحدث، بدورة الألعاب الأوليمبية طوكيو 2020، عن أزمة خلال مرانه صباح اليوم الأربعاء، باستاد القاهرة.
وكتب الجندي عبر حسابه الرسمي على موقع التواصل الاجتماعي "فيسبوك": "حصل موقف النهاردة عند مجمع حمامات السباحة بستاد القاهرة، الساعة 6 الصبح وأنا داخل التمرين، الأمن قال لي إن في تعليمات بعدم دخول العربيات لجراج المخصص لحمام السباحة، ولا حتى الركنة في محيط الباب الخارجي للجراج".
وتابع: "يعني لو عايز تركن يبقى تروح تركن بعيد عن الباب بحوالي 100 متر، يعني انت محتاجلك حوالي من 10 لـ 15 دقيقة عشان توصل لحمام السباحة نفسه بسبب مسافة الجراج الكبيرة أساسًا".
وواصل: "في المهم بسأل الأمن ليه التعليمات دي، قال لي أصل في مسؤول كان داخل حمام السباحة إمبارح الثلاثاء اتعطل 12دقيقة، فالدنيا اتقلبت والمسؤول قرر إنه يعاقب الكل، إن مفيش عربيات تدخل الجراج اللي بياخد حوالي 200 عربية، بدون عمل أي إعتبار إن دا لاعب منتخب ولا أي حاجة".
وأكمل بطل الخماسي الحديث: "ومش بس كدة لا، دا كمان محدش يركن في محيط الباب الخارجي أصلًا، اللي هو أنا بعاقبك انك هتدخل بشنط التمرين 15 دقيقة مشي الساعة 6 الصبح، وتتأخر على تمرينك عشان أننا المسؤول، أركن مكان الـ200 عربية".
وأشار: "يعني انا أبقى صاحي 5 الصبح وورايا يوم طويل، عشان أروح مكان التمرين اللي هو أصلا المفروض تبقى كل حاجة متسهلة فيه، مش بنقول بقى دة موقف في الشارع فطبيعي إنه يحصل، ومع كامل احترامي الفكرة إن المسؤول ده المفروض إنه عارف قد إيه إن اللاعب بيبقى الصبح صاحي مش شايف قدامه من قلة النوم إو المجهود، فبدل ما تيسرله تمرينه لا إحنا نعطله أكتر".
واختتم: "أنا مش هربط الموضوع دة بموضوع محمد الشوربجي لاعب الاسكواش، لإن المشكلة ده تعتبر نقطة في بحر وممكن أي حد تاني يشوفها مش مستاهلة ولا أي حاجة، لكن لا أي حد بيلعب رياضة بشكل محترف هيفهم النقطة في إن كل واحد فينا مبيصدق يلاقي حاجة تريحه، يعني أنا لو عليا كنت ركنت عربيتي مكان البداية بتاع حمام السباحة".
اقرأ أيضًا: مساعد فايلر يكشف حقيقة موافقة السويسري على تدريب الزمالك
وأتم: "السؤال اللي كنت عايز اسأله هنا، حضرتك ناوي تفضل معاقبنا لحد امتى؟".
