ماذا قال الجمهور عن «كيرة والجن» في أول أيام عرضه؟

انطلق أمس الخميس عرض فيلم كيرة والجن للنجمين أحمد عز وكريم عبد العزيز المنتظر عرضه على مدار الـ 3 سنوات الماضية.

وتباينت ردود فعل الجمهور على السوشال ميديا، فكتب أحدهم: "مروان حامد وأحمد مراد وكريم عبد العزيز وأحمد عز الأربعة بيقدموا سينما حقيقية.. فيلم كيرة والجن إمتاع بصري.. قصة مُحكمة ومحبوكة تحتوي على كل عناصر التأثير والتأثر.. شكرًا على سينما حقيقية افتقدناها كتير.. سينما مروان حامد".

وعلق آخر: "هنا سأسكت قليلًا احتراما وتقديرًا لهذا الجميل.. فيلم جميل جدا زي ما توقعت، أداء وتصوير وكل حاجة عظمة بجد"، وجاء تعليق آخر: "لسه طالع من السينما وتقريبًا ما شفتش تقنيات الأكشن الفظيع ده قبل كده في فيلم عربي، والتصوير والكادرات العظيمة والموسيقى التحفة من هشام نزيه اللي بيثبت أنه أفضل موسيقار على الساحة حاليًا، وكمان اللحظات الرومانسية كانت في مشهد من أفضل مشاهد الفيلم وعجبني جدًا، وطبعا أفضل واحد كان له لحظات درامية أحمد عز اللي يعتبر بالنسبة لي أفضل ممثل بالفيلم، ومشهد النهاية اللي كان هيبوظ الفيلم وكان هيبقى فيلم هندي بس الحمد لله اتعالج في ساعتها".

وجاء تعليق آخر: "عارف لما تسرح بخيالك وتسيبه يعمل سيناريوهات مش ممكن تحصل على أرض الواقع، المصطلح ده اللي بيسموه أحلام العصرية، فريق الأحلام أو منتخب العالم في الكورة.. يمكن ده أنسب وصف لفيلم كيرة والجن"، وعلق آخر: "أنا خارج من الفيلم وحاسس إني محتاج أشوفه تاني.. يستاهل نستناه 3 سنين، يستاهل الفلوس اللي دفعتها عشان أتفرّج عليه".

اقرأ أيضًا: التفاصيل الكاملة لأول حفل لـ هاني شاكر عقب استقالته من نقابة الموسيقيين

وأضاف: "يستاهل إني أقعد 3 ساعات قدامه.. توقعت يكون فيه ملل أو وقت الأحداث تاخد فيه هدنة وطبيعي لأن الفيلم 3 ساعات، بس الهدنة والنفس اللي خدته كان في الريست اللي بين الفيلمين.. غير كده انت 3 ساعات متاخد من مشهد لمشهد وكل واحد فيهم مهم ما ينفعش تستغنى عنه".

واختتم: "فيه مشاهد في الإعلان تحسسك إن الفيلم هيقفل بيها بس حقيقي الفيلم تقيل لدرجة إنه بدأ بأتقل مشاهد، وفضل يعلى لحد ما بيوصلك لذروة المتعة بصريًا وسمعيًا وتمثيليًا".