الشاعر بهاء الدين محمد يتراجع عن قرار اعتزاله.. والسبب مفاجأة

تراجع الشاعر بهاء الدين محمد عن قرار اعتزاله الذى أعلنه منذ 7 أيام، ولم يكشف وقتها عن الأسباب التى قادته إلى هذا القرار، ليعود اليوم ويعلن تراجع عن الاعتزال وكشف عن أسبابه.

تراجع الشاعر بهاء الدين محمد عن قرار اعتزاله العمل الفني

كتب بهاء الدين محمد عبر حسابه الشخصي بموقع التواصل الاجتماعي فيسبوك: "مهما توقعت أو حسيت أو تخيلت مش هعرف أوصف إحساسى بكلام يرد بكل احترام على رد فعلكم وفعل زمايلى الفنانين اللى رافضين قرار اعتزالي والتركيز فقط على تأملات فى نِعم الله.. ورد الفعل اللى رافض القرار خلانى أسكت وأفهم وأعرف وأشوف بصورة واضحة مدى الحب والتقدير،، اللي وصلني من كل مكان وعرفت من خلاله إن ليا مكان في قلوب من حقهم رفض قرار اعتزالي".

وتابع الشاعر الغنائي: كانت لحظة تقيلة على القلب.. ولكن اكتفيت بالتخلص نهائى من الأصناف دي اللى بتقصد تتسبب في أى ضرر وابتزاز بكل شر وطمع واستنزاف للإنسانية اللي ربنا خلقني بيها.. حتى لو كنت بأعاملهم بكل خير وماخدوش بالهم إن الطيبة اللي جوايا طيبة من قوتي ورحمتي.. وخاصة لما ألاقي اللى بيتعامل معايا ضعيف وناقص.

وأضاف بهاء الدين محمد: " ولكن لابد من مواجهتهم بكل ردع ولازم يتحطلهم حدود.. لأني مازلت بأواجه بقايا الناس دي ولكن إن شاء الله حهكسب في النهاية لأن اللي يخسرني خسران ويستاهل مصيره اللى اختاره.. لذلك قررت شطب واستئصال كل حد لا يليق ومرفوض، واحتفظت فقط بالناس اللي قلوبهم ونيتهم سليمة في الفن والحياة، وشكرا على هذا الحب والاحترام اللى هفضل قده وأرد عليه بكل فن..

وتابع قائلا: "بشكر كل قلب كتب لي أو بعت لي أو كلمني يطمن علي وإعتبرته شاركني ووقف معايا بكل حب في التجربة دي.. ومهم جدا أقول أنا مش بتاع تريندات ولا ظهور إعلامي.. بالعكس من سنين اخدت قرار اني أعيش في حالي بعيدا عن الأضواء وأسيب أعمالي فقط في دايرة الضوء.. ويكفيني إن كلماتي تعيش وتفضل ناجحة وفي قلوبكم.. شكرا من قلبي يا أغلى الناس".

واختتم: ورد الفعل اللى رافض الإعتزال خلانى أتجاوز اللحظة اللى خليتنى أفكر في القرار.. كانت لحظة سخيفة اتجمعت فيها أحداث كتيرة مش حلوة ونفوس وقلوب كلها حقد وسواد وغباء في الحياة الفنية والشخصية.. كم كبير من ضعف وطمع ناس مش ناس.. وأنا مهما قابلت وكنت قد أي هجوم قذر او بالمعنى الأوضح "وساخة ناس مريضة وكلها غل ونقص".. لكن حسيت إنى محتاج هدوء، وكمان حسيت في لحظة إني محتاج أعيش لنفسي ومع نفسي بعيد عن أي ظروف تجبرني على الاحتكاك أو معاملة الناس المرفوضه دين وحياة وأخلاق.. وأنا مش سهل أوصف ناس بالشكل ده".

اقرأ أيضًا:بهاء الدين محمد يعلن إعتزاله.. والنجوم: ”مينفعش أرجوك”

أعمال بهاء الدين محمد

يشار إلى أن الشاعر بهاء الدين محمد تعاون مؤخرا مع العديد من النجوم في أنجح أغانيهم مثل "شوق على شوق" لسميرة سعيد، "أسف حبيبتي" لراغب علامة، "عدى الليل" لإيهاب توفيق، "مش كل حب" لذكرى، "يحكيلي عنها" لهشام عباس، "أصعب حب" لخالد عجاج، "بعتلي نظرة" لأنغام، وغيرهم من الأغاني التي حققت نجاحا كبيرا.