الفن

بيتر ميمي لمنتقدي «الحشاشين»: «صحصحوا معانا كده يا شباب خلونا نعمل شكل جديد»

الجمعة، 15 مارس 2024 02:17 مـ بتوقيت القاهرة

حرص المخرج بيتر ميمي، مخرج مسلسل الحشاشين، الرد على منتقدي المسلسل، بعد حالة الجدل الواسعة المثارة حول العمل بعدما عرضت أول 4 حلقات فقط، رد علي تساؤلات بعض متابعي مسلسل الحشاشين.

أول رد من بيتر ميمي على منتقدي مسلسل الحشاشين

وقال المخرج بيتر ميمي، خلال منشور له عبر حسابه الشخصي، على موقع الفيس بوك: "طيب كل سنة وأنتم طيبين.. مع إنى مكنتش حابب اتكلم علشان دول كلهم 4 حلقات.. مبدئيا المسلسل من وحي التاريخ وده مكتوب نصا في التترات يعني مش وثيقة تاريخية لكنه دراما تاريخية".

وتابع: "هو تارنتينو لما قتل هتلر في السينما كان حقيقة؟ أو نابليون في فيلم ريدلي سكوت الأخير هل ده نابليون اللي في كتب التاريخ؟ ديه دراما تاريخية.. حاولنا نعمل خيال تصويري لفترة من الفترات لكن في شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية".

وأردف: "هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد.. ماركو بولو أو فلادمير بارتول أو برنارد لويس أو فرهاد دفترى.. وكتير جدا، حسن الصباح كان بيعمل معجزات؟ لا طبعا، وده تباعًا مع الحلقات هيتفهم".

واستطرد مخرج مسلسل الحشاشين: "الحشاشين مسلسل تاريخي بالعامية المصرية.. الأحداث بين أتراك وفرس.. لما عملوه الأتراك اتكلموا تركي ولما عملوه الأمريكان بيتكلموا إنجليزي.. احنا عاملينه في مصر والترجمة موجودة في كل بلد.. المسلسل بيتعرض في روسيا وأمريكا وأكتر من بلد كل بلد بلغتها.. هم الڤيكنجز كانوا بيتكلموا إنجليزي، ولا ويليام والأس كان بيتكلم اللكنة الأمريكية".

واستكمل بيتر ميمي: "ليه حسن الصباح.. حسن الصباح شخصية فذة وغريبة ومستفزة أنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم.. أو على مستوانا المصري خط الصعيد أو سفاح إسكندرية".

وواصل حديثه: "أم الخليفة رصد كانت نوبية الأصل، وإسكندرية مدينة في مصر.. لأن في مدن كتير باسم إسكندرية حوالين العالم.. لزم التوضيح للترجمة لأن فيه غير مصريين بيتفرجوا على المسلسل ومجاعة القاهرة الفاطمية مثبوتة تاريخيا، لكن تعددت أشكالها حسب المصادر، وهي على فكرة كانت قبل وصول حسن بفترة مش بعيدة بس ديه دراما (من وحي التاريخ)، ماتسمى بمعجزات حسن الصباح مقصود تتصور بالشكل ده.. وده هيبان تباعا وخصوصا مشهد الراوي حلقة 8، عم ملك شاه اتقتل بوتر القوس لأن ده كان عرف وتقليد، مين الست اللي بتظهر لحسن الصباح؟ ده في حلقة 30 بقى لو ربنا ادانا عمر".

واختتم بيتر ميمي رسالته، قائلا: "كل سنة وأنتم طيبين وسعيد أن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللي إحنا عاملينه.. ومع الوقت ننافس".