مجد القاسم: اتمنعت من الحفلات والتليفزيون واترحلت بسبب اتجاهات شقيقي السياسية.. وعادل إمام قالي هتكلم في موضوعك وهترجع

تحدث الفنان السوري مجد القاسم، عن فترة استبعاده من الساحة الفنية وترحيله من مصر بسبب اتجاهات شقيقه فيصل القاسم السياسية، وعودته من جديد بعد 3 أشهر، وتفاصيل مكالمة الزعيم عادل إمام له.

وقال مجد القاسم في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": الفترة دي كانت صعبة، لأني كنت في عز نجوميتي ونجاحي ومكسر الدنيا، وكنت القاسم المشترك في كل حفلة في مصر والوطن العربي، وفجأة يتقفل عليا في كل الوطن العربي لأني أخو فيصل القاسم، طيب أنا فنان ومش بوافقه في اتجاهاته، ولكن كل ده علشان أنا أخوه، وطبعًا مُنعت من الحفلات والتليفزيون في مصر والوطن العربي واترحلت، لغاية ما رجعوني تاني.

وتابع: علاقتي بـ أخويا اتوتر ولكن هيعمل إيه ده شغله وله محطات، ولكن علاقتنا رجعت كويسة ده أخويا الكبير وتاج راسي، ولكن بعدين كل الأمور اتغيرت، وأنا عانيت من الموضوع ده حتى بعد عز نجاحي بـ 5 سنين، ومكنتش بطلع في حفلات وكله كان خايف يذيع ليا في التليفزيون.

وأضاف: رجعت بعد 3 شهور ومش عارف أعمل إيه، وخايف والأبواب مقفولة كلها إلا الأفراح وأنا كنت رقم واحد، ويوم ما رجعت اشتغلت أفراح، وكنت ممنوع من التلفزيون، وبدأت أعمل ألبوم سنة 2000 وحطيت في دماغي أني هعمل 12 أغنية مفيش فيهم أغنية تقع، ولو معملتش كده بعد الوقفة دي كلها مش هتقوملي قومة تاني.

واستكمل: عملت 11 أغنية مكنش فيهم غلطة وكلهم نجحوا، والمنتج قالي إحنا نزلنا مليون شريط في السوق، وكسرت الدنيا.

كما كشف مجد القاسم تفاصيل مكالمة الزعيم عادل إمام له، قائلًا: في ناس كتير وقت أزمتي كان معرفتي بيها قليلة وطلعوا أجدع ناس، وأول تليفون جالي بعد الأزمة كان حميد الشاعري بيتطمن عليا، وتاني تليفون كان من الفنان الكبير ربنا يديه الصحة عادل إمام وطمني وقالي متشلش هم قريب جدًا هترجع وأنا هتكلم في موضوعك.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.