شيرين عبد الوهاب: «فعلت مصيبة ولن أنساها.. واللي يزعل بناتي هموته»
ما زالت النجمة شيرين عبد الوهاب تتواصل مع جمهورها ومتابعيها عبر خاصية "اسألني"، بحسابها على "إنستجرام"، وفي كل مرة تكون هناك إجابات مفاجأة للنجمة شيرين عبد الوهاب في إجاباتها على الجمهور. وإليكم أبرز الاسئلة والأجوبة لشيرين.
فكرة ملازمتك من الطفولة لحد الأن؟
عمل استعراضي كبير
بتسمعي أغانيكي في يومك وبتحبي صوتك؟
أنا لما بسمع نفسي ببقى بسمع كأني غريبة زيكم بالظبط، وآه طبعًا بسمع أغاني ليا، مثلا كل ما بسمع بتوحشني بعيط كأني مش أنا اللي مغنياها.
هل شيرين شخص كثير التأجيل في حياته؟
لا خالص بالعكس، بس مش عايزين ننسى إن في ظروف مرينا بيها آثرت فينا زي الكورونا وظروف الثورة. خليتنا نتأثر وشوية خدت من حماسنا.
إيه رأيك ي كلام بهاء الدين محمد؟
والله أنا مش شايفة ليه أي مبرر.
حبيتي في حياتك كام مرة؟
مرة واحدة بس.
ليه حفلات كتير اتلغتلك السنة اللي فاتت؟
في ناس بتقول إنها متفقة معايا على حفلات وإني لغيتها وده كلام مش صحيح فبتتلغي لعدم وجود اتفاق من الأساس.
لو قدامك مغنية من دول تعملي معاها دويتو تختاري مين. أصالة وإليسا ونجوى كرم؟
أنا كفنانة اتشرف إني أغني معاهم كلهم لأني بحترمهم وبحترم فنهم.
ليه يا شيرين حفلاتك في مصر غالية. احنا كطلاب منقدرش ندفع 1200- 800 في تيكيت.
عندك حق حبيبتي واحنا بنشتغل نعمل حفلات أسعارها مناسبة للكل إن شاء الله قريب.
هتبقي حماة صعبة ولا شيرين عادي؟
بالعكس أنا هحب أجواز بناتي أكثر من بناتي بس لو حد زعلهم هموته.
إيه أكتر مصيبة عملتيها وانتي صغيرة ومش قادرة تنسيها؟
خالتي سابتلي بنتها أخد بالي منها، حطيت بنت خالتي في التلاجة وهي اللفة عشان أحس إنها في أمان أكثر، وطبعًا ممنوع التجارب.
بحسك بتغيري من جيل الفنانات اللي بعدك وأصغر منك، مبتدعميش حد منهم خالص مع إن في أصوات جميلة.
بالعكس أنا طول عمري بقول إن احنا عندنا أصوات مهمة جدًا في بلدنا زي ريهام عبد الحكيم ومي فاروق، وأصوات شابة واعدة جدًا زي ياسمين نيازي وكارمن سليمان وياسمين عزت ولارا إسكندر.
بتحبي تامر حسني؟
طبعًا بحب تامر حسني لأنه شيرين كفاح، هو شاهد وشريك على بدايات نجاحتنا احنا الاثنين.
اقرأ أيضًا..
ندمت على حلاقة شعرها ودافعت عن محمد صلاح.. أبرز إجابات شيرين عبد الوهاب على متابعيها
بتحبي دلوقتي؟
آه طبعًا بحب نفسي وبحب بناتي وبحبكم وفوق كل ده بحب ربنا وصدقوني لما هتحبوا ربنا أكثر من أي حاجة في الدنيا، أي مشكلة ممكن تهون لأن ده الحب اللي مش بيروح ابدًا.
اتكلمي عن ابو بناتك.
إنسان طيب جدًا وموزع موسيقى من الكبار المهمين وأب حنين وبيهتم ببناته وربنا يحفظه ليهم.
تقبلي تتجوزي حبيب صاحبتك القديم؟
مستحيل ده مبدأ.
بتفتخري بمين من مشاهير بلدك؟
يا نهار أبيض، مين ولا مين ولا مين، مصطفى محمود، رئيسنا ربنا يديله الصحة وطولة العمر، فضيلة الإمام الشيخ محمد متولي الشعراوي، أم كلثوم، عبد الحليم، سعاد حسني، أحمد زكي، محمود عبد العزيز، نور الشريف، د. مجدي يعقوب.. دول كثير اوي بلدنا مليانة عظماء.
حسام حبيب في كلمة واحدة.
سؤال صعب.
