روجينا: بعد مشهد موت الإبن جالي هيستريا.. وجالي حالة نفسية بعد حلاقة شعري.. (فيديو)

كشفت الفنانة روجينا عن كواليس تحضيرها لشخصيتها في مسلسل ستهم، الذي يشارك في السباق الرمضاني 2023، مؤكده أنها أصيبت بحالة نفسية سيئة بسبب حلاقة شعرها أثناء المسلسل.

قالت روجينا خلال لقاءها في برنامج et بالعربي: "ردود الأفعال حلوة جدًا على الشخصية لإنها حقيقية من الواقع، والناس اتأثرت بالست المصرية اللي اتظلمت ولبست لبس الرجالة واشتغلت ولكن يرفضها المجتمع ويقهرها، والرحلة دي صعبة على أى شخص ولما خوضت التجربة دي بقيت أنا روجينا بتفرج عليها".

كواليس حلاقة شعر روجينا في مسلسل ستهم

وأضافت روجينا: "أنا فعلًا حلقت شعري واتكتب مشاهد للشخصية من غير شعر وأنا كان شعري بدأ يطلع وقولتلهم مش هحلق شعري تاني، وكانوا عايزني أفضل طول المسلسل زى الرجالة وكل ما شعري يطلع أحلقه، وساعتها قولتلهم أنا عملتها مرة ولو حصل ايه مش هعملها تاني".

روجينا : عانيت من حالة نفسية بسبب حلاقة الشعر

وتابعت روجينا عن حلاقة شعرها: "عانيت من حالة نفسية بسب حلاقة شعري ومكنتش قادرة أشوف نفسي في المرايا وبقيت مادة للسخرية في البيت وقالولي عشان شخصية تعملي كده في نفسك؟ وحسيت إحساس وحش قوي وبحط شعر مستعار لو عندي أى مناسبة أو تكريم".

روجينا عن أصعب مشاهدها في مسلسل ستهم

أما عن أصعب مشاهدها في المسلسل، قالت روجينا: "مشهد موت الإبن كان أصعب مشهد عليا، وبعد ما خلصنا المشهد اترميت على الأرض وجالي هيستيريا ولحد دلوقتي نفسيتي مش مظبوطة وحاسه بظلم وقهر من جوايا وعندي ردود أفعال زى الرجالة، ولما كنت بضرب الراجل في الجبل كنت عايزة أثبت إني جامدة واكتشفت إن الإزازة اللي كنت هضربه بيها في المشهد حقيقية وضرب الراجل دماغة اتفتحت وأغمى عليا".

أبطال مسلسل ستهم

مسلسل "ستهم" بطولة الفنانة روجينا، محمد عبد الحافظ، إياد نصار، أمير صلاح، نانسي صلاح، ياسين التهامي، جهاد سعد، أحمد الرافعي، إبراهيم السمان، محمد يونس، سلوى عثمان، وعد آخر من الفنانين، والمسلسل من تأليف ناصر عبد الرحمن، والإخراج رؤوف عبد العزيز، ويناقش المسلسل قصة حقيقية لسيدة أجبرتها الظروف على العمل مثل الرجال.