عمرو سلامة: الفنان مش دوره يبقى مصلح مجتمعي ولا مؤرخ

نشر المخرج عمرو سلامة بوست عبر حسابه الرسمي على فيسبوك معبراً من خلاله عن رأيه في الفن وأنه ليس له دور في تغير المجتمع كما أن الفنان ليس مصلح اجتماعي.

وكتب عمرو سلامه: جميل أن عمل درامي يفكر الناس بظلم منسي أو مسكوت عنه في المجتمع يتحرك ويحاول يغير القوانين، وتحية لأي عمل فني راقي تسبب في تغيير إيجابي.. بس في رأيي المتواضع ده عرض جانبي حميد ونتيجة طبيعة، بس مينفعش الفن يكون بيتعمل لغرض تغيير المجتمع.

وأضاف: غرض الفن هو التعبير عن النفس البحث عن الجمال وإمتاع المتلقي والسعي حول اكتشاف الإنسانية المشتركة بين كل البشر.. ولو نجح فيما سبق المجتمع هيتغير لوحده أو مايتغيرش مش موضوعنا.

وتابع: اللي دوره يغير القوانين ويبحث عن محاربة الظلم هم ممثلين الشعوب.. اللي دوره يقوم المجتمع وينتشله من الجهل هي المؤسسات التعليمية.. اللي دوره يعلم الناس دينهم هي المؤسسات الدينية.. اللي دوره يعلم الناس الأخلاق هم المفكرين والفلاسفة.. اللي دوره ينظف المجتمع هو هيئات المرافق والنظافة.. الفنان مش دوره يبقى مصلح مجتمعي ولا مسؤول ولا مقوم ولا معلم ولا مؤرخ ولا طبيب ولا عامل نظافة.. وهو حتى لو حاول يقوم بالأدوار ديه هيكون غير مؤهل ولا يصلح لها وبالمناسبة في الأغلب ساعتها هينتج فن أسوأ كمان.

واختتم المخرج عمرو سلامة حديثه قائلاً: الفنان لو كان صادق وعايز يحكي قصص حقيقية ويكون مخلص ليها هيحرك المياه الراكدة كنتيجة حتمية بدون ما يكون ده هدفه الأساسي.. المجتمع بس لما بيغلب بيروح للفن ويطالبه هو اللي يقوم بأدوار غير أدواره.