أول رد من لاعب الأهلي بعد الرحيل إلى إنبي

كشف محمد شومان لاعب تنس الطاولة بالنادي الأهلي، عن كواليس رحيله إلى إنبي بعد انتهاء عقده مع القلعة الحمراء.

وكتب شومان عبر صفحته الرسمية: "مكنتش حابب أعلق على أي حاجه أو أكتب أو أنشر أي حاجة، بس فعلًا أنا اتضايقت جدًا من أخر حاجة سمعتها إنني سبت الأهلي بسبب أني شايف إني مليش مكان وسط النجوم اللي موجودة".

وأضاف لاعب تنس الأهلي: "طبعًا الكلام ده مش صحيح وبرده مش هتكلم في تفاصيل، بس أي رياضي لو مش شايف نفسه أنه أحسن واحد يبقى عمره ما هيكون بطل.. الحمد لله أنا نجم وبطل وليا مكان وسط أي فريق".

وتابع شومان: "كان صراع معنوي قوي جدًا عشان أخرج من بيتي النادي الأهلي، ويبقي ليا أي طموح في مكان تاني، حاولت كتير أسيطر على الغضب اللي جوايا، وتقبل الأمر لكن فشلت، اتخذت القرار اللي أنا شايفه مناسب ليا نفسيًا ومعنويًا".

وواصل نجم الأهلي: "عمومًا الأهلي كيان عظيم وفيه أقوى وأحسن لاعيبة في مصر كلهم بلا استثناء، وشرف لأي لاعب مش في مصر بس أنه يلعب في وسط اللاعيبة دي".

وأردف لاعب القلعة الحمراء: "الأهلي علمني حاجات كتير بس أولها إني مقبلش غير برقم واحد فقط، غير كده مفيش حاجة اسمها مراكز مشرفة، 25 عامًا تحملت المسؤولية كاملة من الناشئين إلى الفريق الأول والحمد الله نجحت في كل التحديات بدون فشل واحد".

اقرأ أيضًا: منتخب الإسكواش يختتم المجموعات في بطولة العالم بالفوز على ماليزيا

واختتم شومان: "من النهاردة لحد السنة الجاية نهائي الدوري، هعمل كل حاجة ينفع تتعمل عشان أرضي طموحاتي مع نادي إنبي، أخيرًا بشكر أي حد دعمني أو كان واقف جنبي محبة فيا أو للكيان، وبرده بشكر أي حد انتقدني أو جه عليا كرهًا فيا فعلًا كنتم البنزين بتاعي عشان أطلع كل حاجة عندي".

ووجه شومان رسالته للأهلي قائلًا: "بشكر جمهور الأهلي وكل واحد دعمني وأصحاب الفضل عليا بعد ربنا في كل شيء ويمكن أرجع بيتي تاني إذا شاءت الأقدار".