بالفيديو
”حلم تامر أمين”.. ضربة جزاء في الدقيقة 82 يُسدّدها مروان محسن
أحمد علاء -
كشف الإعلامي تامر أمين عن الحلم الذي جاءه قبل مواجهة الزمالك والأهلي في نهائي دوري أبطال إفريقيا في التاسعة من مساء الجمعة على ستاد القاهرة.
وقال أمين خلال برنامجه "آخر النهار" على شاشة "النهار"، مساء الخميس: "أنا حلمت إن الماتش وصل للدقيقة 82 والنتيجة تعادل سلبي وحصل الأهلي على ضربة جزاء.. ولقيت داخل على تنفيذها بعيد عنكم مروان محسن".
وأضاف: "فضلت أضرب كف على كف، يعني هو ساب أقفشة والسولية والشحات وأجاي وخلى مروان هو اللي يشوط.. غمضت عيني وقولت يارب، ومسك مروان الكورة وداخل يشوط فالنور قطع".
وتابع: "لما النور قطع بثانية سمعت ناس بتحتفل.. مبقتش عارف هل ده جمهور الأهلي فرحان بالهدف ولا جمهور الزمالك فرحان بضياع الكورة".
واستطرد: "فضلت حاطط إيدي على قلبي لغاية ما صحيت من النوم.. دي حاجة واطية أوي، الحلم ده عمل معايا الجلاشة.. صحيت مش عارف أفرح ولا لأ".
في سياق متصل، رفض أمين إطلاق وصف "نهائي القرن" على مباراة الزمالك والأهلي، وقال: "دي مباراة مهمة وديربي إفريقي بس ليه نقول عليها نهائي القرن والمباراة التي لن تتكرر.. ممكن السنة الجاية يتكرر عادي جدًا".
وأوضح أمين: "المستوى الفني للأهلي والزمالك يؤهلهما للصعود لنهائي البطولة في العام المقبل، هل نسميه نهائي الكون؟.. الماتش ده ممكن يتكرر 70 سنة جاية.. اللي بيطلع المصطلحات دي قاصد يعمل احتقان علشان يسخن بتوع الكورة".