رشا مهدي: ماسلمتش من لسان عبد الرحمن أبو زهرة وانفجر فيا.. وهكذا كان رد فعل عادل إمام
روّت الفنانة رشا مهدي، مساء الإثنين، موقفا جمعها مع الفنان الكبير عبد الرحمن أبو زهرة أثناء تصوير آخر عمل جمعهما سويا وهو مسلسل "أستاذ ورئيس قسم" للزعيم عادل إمام.
وكتبت رشا مهدي، عبر حسابها بموقع التواصل الاجتماعي "فيسبوك"، "بمناسبة الكلام عن علاقة عمنا الأستاذ عبدالرحمن أبو زهرة بالممثلات والنجمات في اللوكيشن وإن محدش سلم من لسانه.. أنا اشتغلت مع الأستاذ كذا عمل آخرهم مسلسل (أستاذ ورئيس قسم) مع الزعيم وماشفتش من أستاذ عبدالرحمن غير كل خير طبعا، بس آخر عمل ده بصراحة ماسلمتش من لسانه وهحكي إيه اللي حصل".
اقرأ أيضا| نيكي ميناج تحتضن بطنها العارية وتعلن حملها بطفلها الأول
أضافت رشا مهدي: "أول يوم تصوير شفته وكنا من سنين متقابلناش، فسلمت عليه قام ربنا يديله الصحة وسلم عليا بس كان بسرعة أوي ورجع قعد تاني، بصراحة اتفاجئت وخفت يكون زعلان مني، فبعد ما سلمت على الناس رجعتله وقعدت جمبه وفضل ساكت فقلقت أكتر وقلتله حضرتك فاكرني؟ فمن غير ما يبصلي قالي آه فاكرك".
تابعت: "بصراحة استغربت أكتر من طريقة المعاملة، وفضل ساكت فقلتله طب فاكر اشتغلنا إيه مع بعض؟ قالي آه وسكت برضو، بصراحة الموضوع استفزني أكتر فقلتله طب أنا اسمي إيه؟ وهنا انفجر فيا وقالي بصوت عالي (رشا مهدي فاكرك يا بنتي والله فاكرك، واشتغلنا كذا وكذا وكذا، ولو إنتي بقى فاكرة كنت بقول سيبوني أركز قبل التصوير عشان أعرف اشتغل، وإنتي كمان قومي ذاكري ونبقى نتساير بعد الشغل يا بنتي".
استكملت: "أنا طبعا مقدرتش أمسك نفسي وضحكت وهو بيزعق واللوكيشن كله ضحك، وهو حبيبي ممسكش نفسه وضحك وطبطب عليا وقالي يا بنتي كنت مركز، متزعليش مني، وقعد يسأل على ماما وإخواتي وعليا، ويقولي رأيه في شغلي وبعدها قمنا نحضر".
اختتمت: "فجأة الزعيم راح للأستاذ عبدالرحمن وهو مركز تاني وقرب منه وقاله بصوت عالي (أنت فاكرني؟)، طبعا مش محتاجة أكمل إيفيه أنت فاكرني ده كان عامل إيه في اللوكيشن طول التصوير.. عمنا عبدالرحمن حضرتك نجم وفنان وأب من الزمن الجميل ربنا يديك الصحة، طول عمرك قامة وقيمة ومبتبخلش على حد بخبرتك وفنك.. أنت فاكرني طيب؟".
اقرأ أيضا| القصة الكاملة للهجوم على عبد الرحمن أبو زهرة ورده على الاتهامات (فيديو)
