”رصيدك نفد بعت الكل واشتريت الفلوس”.. سيف زاهر يفتح النار على حسام عاشور
فتح الإعلامي سيف زاهر النار على حسام عاشور لاعب الفريق الأول لكرة القدم السابق بالنادي الأهلي، بعد تصريحاته الأخيرة ضد مجلس إدارة القلعة الحمراء بعد انتهاء علاقته بالفريق.
وكان حسام عاشور قد خرج على وسائل الإعلام كاشفًا تفاصيل جديدة في خلافه مع مجلس إدارة الأهلي برئاسة محمود الخطيب، وعلاقة تركي آل الشيخ.
وقال سيف زاهر في تصريحات عبر برنامجه الإذاعي على راديو "أون سبورت": "كفاية يا عاشور لعب بالورق، أنت خرجت من الباب الصغير وخسرت كل حاجة، لو عايز نصيحة يا تقول حاجة كويسة يا تسكت".
وتابع: "ابعد عن الأهلي ومتتكلمش عن النادي تاني، رصيدك نفد يا عاشور، مش معمول عليك حملة زي ما صرحت، ده شعور جمهور كبير حبك وكرهك بفضل تصرفاتك ".
وواصل سيف زاهر تصريحاته: "لازم أعتذر لجمهور الأهلى العظيم لأنه كان صح في أزمة حسام عاشور، كنت بخرج أدافع عنه وأقول للجمهور بلاش قسوة، وبشويش على الكابتن التاريخي، حتى الزمالك كان محترم فى الأزمة ورفض تسريبات عاشور أن فيه تفاوض معاه وقالوا مش عايزين مزايدة من اللاعب ".
وأضاف: "حسام عاشور لاعب باع ناديه وتاريخه عشان الفلوس، تاريخه راح ورصيده راح، التاريخ يحسب بالالتزام وبالأخلاق وبحب الكيان".
وشدد: "أنا أهلاوى بس بتكلم كإعلامى، الأهلى فوق رأس جميع محبيه بس واضح أن الفلوس هى الأساس، عاشور مقالش جملة واحدة صح فى كلامه، لست مقرباً من الخطيب حتى أدافع عنه ولكن برىء تماماً في أزمة عاشور، هما عالملوه اللي متعملش في تاريخ الأهلي".
اقرأ أيضَا: حسام عاشور يكشف تفاصيل جديدة في خلافة مع الأهلي: النادي طلب من آل الشيخ تنظيم اعتزالي ثم ماطلني مسؤوليه
وأوضح: "عماد متعب عمل للأهلي قد اللي عمله حسام عاشور 100 مرة وطلب من مجلس الأهلى مباراة اعتزال، الكابتن الخطيب قاله مش بنعمل مباريات بنشارك بس، ومع ذلك متعب مأهنش إدارة الأهلى ولم يتلفظ بلفظ واحد على كيان الأهلى ولا الخطيب، وكذلك حسام غالى لأنهم عارفين يعنى أيه أهلى ويعنى أيه الكيان".
