عماد متعب يوبخ صالح جمعة: ”طيب وعبيط وقفل ولو في إيدي هحبسه” (فيديو)
أكد عماد متعب، لاعب الأهلي ومنتخب مصر الأسبق أنه لا يجد كلامًا يوجهه لصالح جمعة كنوع من النصيحة.
وقال عماد متعب في تصريحاته لقناة "أون تايم سبورتس":" بجد معنديش حاجة أقولها لصالح خلاص، هو أكتر واحد نصحته وأكتر واحد دافعت عنه، لإني عارف موهبته وإمكانياته ولكن هو مش عاوز، نفسي أقوله حاجة مش عارف أقوله إيه".
وأضاف: يابني ده مستقبلك، ده أكل عيشك، إنت لاعب في النادي الأهلي، عارف يعني إيه النادي الأهلي، وجماهير النادي الأهلي، ومجلس إدارة النادي الأهلي".
وتابع: "أي حاجة عاوز تعملها بعد الكرة هتقدر تعملها، أنا أهو نفسي أرجع ألعب خمس دقائق، مش عارف مبقاش ينفع، ركز في الكورة وحياتك وأكل عيشك دلوقتي، وبعد ما تخلص كرة إعمل اللي انت عاوزه، لو ليا حكم على صالح جمعة هحبسه في البيت، ميطلعش غير التمرين، ستة شهور سنة أكتر أقل".
وأكمل: "لما كنت في الأهلي كنت بأقوله يابن اللذين انت إزاي جماهير الأهلي بتحبك كده؟ إحنا عملنا كتير وقدمنا كتير، عشان ناخد الحب ده، انت إزاي واخد الحب ده كله؟ انت المفروض تكون بتغير إزاي الناس بتلعب كرة وبتجيب أهداف وأنت مش بتلعب وبره على طول، الكرة مش كده، عمرها ما كانت بالتقطيع، في منافسين وفي ناس بتعافر علشان تلعب، انت بتخسر الناس يوم بعد يوم، كنت بكلم صالح جمعة كل يوم، الفترة الأخيرة معدتش بكلمه مش لاقي حاجة أقولها".
واستطرد: "آخر سنة ونص لي في الأهلي كنت باتعمد أخليه معايه في الغرفة، علشان أحاول أغير منه، وحاولت على قدر استطاعتي، هو لاعب غلبان، وعبيط، وطيب على المستوى الشخصي جدًا، لكن دماغه في حتة تانية، وبعدين فين دور أصدقائه، والناس اللي بتحبه، وإلا مش معقولة يكونوا بينصحوه وهو قفل كده".
وتابع: "يا صالح ركز في شغلك وأكل عيشك، ما تخرجش غير لما تكون فاضي، ما تقعدش مع صحابك غير في أوقات الأجازات أو التوقف، انت جوه الأهلي والفرقة وانت اللي بتبعد نفسك بنفسك".
اقرأ أيضًا: عماد متعب عن الإعتزال: ”أفضل قرار اتخذه في مسيرته”
واختتم: "النادي الأهلي عمل معاه كل حاجة والمدير الفني عمل معاه كل حاجة، وزمايله في الفرقة نصحوه كتير، يا صالح انت عندك حب الناس فنصيحة متخسرهمش، خد عبدالله جمعة أخوك خير مثال، هو لاعب في الزمالك ويقدم مستويات رائعة، وكنا بنطالب بانضمامه لمنتخب مصر السنة اللي فاتت خده مثال وقدوة ليك".
