الفن

زوج ابنة نجلاء فتحي يرد على منتقدي حمله لحذائها في الجونة: حاجة لا تعييني ولا تقلل مني

الأربعاء، 28 أكتوبر 2020 02:03 مـ بتوقيت القاهرة

خرج المخرج محمد خضر زوج ياسمين أبو النجا ابنة الفنانة نجلاء فتحي، عن صمته بعد الجدل الذي أثير حوله وزوجته بعد ظهورهما على السجادة الحمراء في فعاليات الجونة السينمائي، وهو يحمل حذائها مما أثار دهشة المتواجدين ومستخدمي السوشيال ميديا.

وأصدر المخرج محمد خضر بيانًا يرد من خلاله على استفسارات الجمهور حول سبب حمله حذاء زوجته وهل كان الهدف الاستعراض وخطف الأنظار، والثاني عن سر حضوره مهرجان الجونة رغم إعلانه سابقا عن وجود خصومة بينه وبين إدارته بعدما استولوا على فكرته وأنكروا حقوقه المادية والأدبية.

وجاء البيان الذي أصدره محمد خضر تحت عنوان "لمن يهمه الأمر" وكتب فيه: "عندي بس تعليقين صغيرين عايز أقولهم لمن يهمه الأمر:- بالنسبة للصورة بتاعتي أنا ومراتي، الصورة ديه اتاخدت واحنا مروحين الساعة 1.30 صباحًا من حفل الافتتاح، مش وإحنا داخلين حفل الافتتاح، أكيد مش هدخل حفلة شايل جزمة مراتي وماشي!، إحنا الدعوات بتاعتنا دعوات VIP مش دعوات مشاهير، فده أصلًا ما بيدخلناش على السجادة الحمراء مع الفنانين، ده بيدخلنا من باب تاني جنبه، ما فيهوش كاميرات".

أضاف: "كل ما هناك أن بعد 6 ساعات من الحفل، وإحنا خارجين باب الخروج كان زحمة وكل الناس خارجه منه، فنانين وغير فنانين ومصورين وكاميرات فيديو، ومراتي أكيد بعد 6 ساعات رجلها تعبت زي أي واحدة رجلها بتتعب في أي فرح.. فقلعت الجزمة! فمن الطبيعي ومن الرجولة ومن الأدب إن أنا اللي أنزل اجيب الجزمة مش هخلي مراتي توطي وسط الناس أكيد، وديه لا حاجة تعييني ولا تقلل مني.. واحدة شايلة بيتي على راسها 15 سنة، مش هاشيل جزمتها 15 دقيقة؟".

واصل: "المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا أسرع، ولقينا المصور العزيز محمد حامد، بيطلب مننا صورة فوقفنا 3 ثواني بالظبط.. ابتسمنا واخدنا الصورة وخلعنا.. والراجل تفضل مشكورًا وبعت لي الصورة على فيس بوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها "للأصدقاء فقط" بس كده".

وعن المشاكل بينه وبين إدارة المهرجان أوضح: "الناس اللي بتسأل أنا إزاي في المهرجان بعد المشاكل أنا بفضل ربِنَا وبفضل دعواتكم”، أعلنا السنة اللي فاتت والجرايد كتبت وأنا كتبت واحد المنظمين طلعت في التلفزيون، وقولت عملنا عقد تصالح مع محمد خضر، خلاص وأخد حقوقه، وبقى ضيف شرف المهرجان كل سنة والسنة ديه اسمها سنة الصلح خير.. وديه تاني سنة ليا في المهرجان كضيف شرف، أنا ومراتي.. وشكرت عندي عالفيسبوك كل الناس اللي وقفوا جنبي وتمنياتي بالتوفيق لمهرجان الجونة".

واستطرد: "تفاصيل عقود التصالح، اللي بيفهم في القانون أو يعرف حد بيفهم في القانون يسأله وهايقوله إن تفاصيل أي عقد تصالح بتبقى سرية للغاية وبيحظر النشر أو الادلاء بها والا يطبق شروط جزائية ومبالغ طائلة على من يخالف ذلك.. إنما اللي مفهوم من الصورة الكبيرة أني أخدت حقوقي خلاص و كمان بقيت ضيف شرف في المهرجان كل سنة".

وانهى بيانه كاتبًا: "وبالمناسبة المهرجان لذيذ قوي السنة ديه وفيه أفلام جامدة جدًا وندوات أجمد وأجمد، ياللا اشوفكم لما نرجع ان شاء الله ، حضن كبير وبوسة كبيرة ليكم كلكم".