شقيقة عبد الباسط: الناس خدت عزايا وأنا عايشة عاوز تموتني ليه؟.. والأخير يرد ”جابتلي السكر”
أعربت الحاجة "شادية" شقيقة الفنان عبد الباسط حمودة، عن غضبها الشديد من شقيقها الذي قال قبل أيام أن شقيقته توفيت بينما تبين بعدها أنها جارته بمثابة شقيقته: "أنا لسه عايشة، عاوز تموتني ليه؟ أنا أختهم الكبيرة والوحيدة على 4 رجالة".
وأضافت "شادية" خلال حوارها في برنامج "تفاصيل" تقديم المذيعة نهال طايل، والمذاع عبر قناة "المحور"، أمس الأحد، إنها فوجئت بإدعاء عبد الباسط حمودة، بوفاتها، متابعة: "إزاي أهل البلد يجوا يعزوني وأنا قاعدة موجودة في بيتي.. إزاي بيقسم بالله إن أخته ماتت وأنا عايشة!!".
وأكدت أنها حاولت التواصل معه لكنه لم يجيب: "هو مقاطعني، ومش بيكلمني خالص من وقتٍ طويل، ساعات بيجي البلد في بركة السبع في المنوفية بس مش بيزورني، بيزور حماته بس مش بيزورني".
أوضحت: "أنا بحبه مزعلتوش، ليه بيعمل كده؟ عاوزاه يحس بيا ويساعدني أنا على قدي وربيت عيالي بتعبي وشقايا.. ده أبونا كان رجل محترم".
وقالت عن جارته التي توفيت: "هي زي أخته، وهي غالية علينا كلنا مش عنده هو بس، كنت قول زي أختي أو أغلى من أختي لكن مش أختي.. بلاش الكذب ده".
وأردفت: "أنا بشوفه في التلفزيون ببقى نفسي أحضنه، وهو قاطعني وخيرني بينه وبين عيالي، وقالي يا تختاريهم يا تختاريني، برغم إنهم يحبونه، ده أنا ربيتهم بتعبي وشقايا".
وكان عبد الباسط حمودة، قد أكد أن السيدة التي توفيت ليست زوجته، بينما هي شقيقته الكبرى، قائلًا: "أقسم بالله أختي الكبيرة اللي ماتت".
وقال عبد الباسط، في مداخلة هاتفية ببرنامج "تفاصيل" المذاع عبر شاشة "المحور"، إنه تعرض للإهانة من شقيقته الكبرى، حيث قال: "كل بيت فيه مشاكل، وكل واحد بيزعل من أخته أو أخوه، لكن مش بيقدروا يستغنوا عن بعض، بس هي جرحتني وزعلتني جامد".
أضاف: "الست اللي مات دي عشرة 38 سنة وجوزها متوفي ومش بتخلف هي أكتر من أخت حبيبتي ومربيالي عيالي وجوزها قبل ما يموت قال لي خلي بالك من أختك لكن أختي ربنا يخليها لي دي أختي وتوجعني".
اقرأ أيضًا: ”إهانة انتهت بجبران خاطر”.. تفاصيل أزمة فرح ابنة هاني مهنا بسبب مطربي المهرجانات
وبسؤاله عن إذا توفيت شقيقته بالفعل قال: "طبعا هزعل عليها ده أنا أموت ممكن يكون في حد لعب في دمغها جرحتني جرح كبير، جالي السكر والضغط وركبت قسطرة، هانتني جامد مش هي بس وعيالها كمان، مع إني بحبهم جدا وهما عارفين وعمري ما كشرت في وش حد"، مضيفًا: "هي دورها ايه لما أنا اتهان؟".
