”تسامحت مع لقب السنيد” و”مش هبطل أحلم”.. صلاح عبدالله يكشف كواليس خطوبته في ”كلمة أخيرة” (فيديو)
حل الفنان صلاح عبدالله ضيف الإعلامية لميس الحديدي مساء أمس الثلاثاء في برنامجها "كلمة أخيرة" المذاع عبر شاشة قناة ON E الفضائية.
وكشف الفنان خلال الحلقة عن كواليس خطبته لزوجته، والحوار الذي دار بينه وبين حماه الراحل، وقال إنه عندما تقدم لخطبتها، سأله حماه "إنت بتمثل فين؟"، وكان رده عليه "في سنبل بعد المليون".
وتابع قائلًا: "قولت لحمايا أنا اللي نزلت في المسلسل على سلم الطيارة في شرم الشيخ وقلت لبيك اللهم لبيك، لما افتكرتها السعودية ومصر كلها ضحكت" مضيفًا: "لكن حمايا وقتها مضحكش وبص لمراتي وكان بيسألها بنظرة عينه كدة مين ده إيه اللي انتي جايباه ده؟".
بدايات صلاح عبد الله الفنية
وعن بداياته الفنية وأهم أدواره، أوضح صلاح عبدالله أن المحطة الثانية له في الدراما التلفزيونية كانت من خلال مشاركته في مسلسل "ذئاب الجبل"، قائلًا: "ده كان نقلة ليا وكان بيني وبين الفنان أحمد عبدالعزيز حالة خاصة من الإبداع تحت إشراف مجدي أبو عميرة، وهنا بدأت الناس تتعرف عليا".
وأضاف صلاح عبدالله: "والمسلسل الثالث الأقرب لقلبي هو الدالي، وأنا بحب الشغل مع نور الشريف، شغل هايل ياحلاوته وجماله، وأنا بحبه من أول مااشتغلت معاه في أعمال كتير زي كتيبة الإعدام ثم 131 أشغال ثم "قلب الليل"، وخلف الدالي دوره في "دم الغزال"، حيث كان مساحته بالعمل فيه أكبر من دور نور الشريف".
وكشف صلاح عبد الله خلال حواره مع لميس الحديدي أنه يعشق أن يقال عليه ممثل أو مشخصاتي، أو مضحكاتي أكثر من نجم، مشيرًا إلى أن قيمته كممثل أكثر من أى لقب آخر.
وأشار الفنان إلى أنه وصل للتسامح مع نفسه، كونه "سنيد" يقدم الدور الثاني، موضحًا: "كنت دايمًا بحلم بالأوسكار ومهرجان كان لكن دلوقتي الحلم كبر وعجز، بس عمري ما بطلت أحلم، وفي النهاية تصالحت مع إني ممثل سنيد".
حياة صلاح عبدالله الشخصية
وعن حياته الشخصية نفى "عبدالله" كونه أبًا ديكتاتوريًا، وقال: "عمري الحمد لله ماكنت أب ديكتاتور ولا أعرف أكون كده مابعرفش لأنها تركيبة إنسانية مش ممكن نختلقها.. ولما بشوف صورةحفيدي بقرأ المعوذتين ولما اتولد مانزلتش ليه صور نهائي وله صور معايا نفسي أنزلها من حلاوتها بس بخاف من الحسد حتى كارما مابقتش أنزل صورها زي زمان".
واختتم الفنان الكبير الحلقة بقصيدة رثاء لنفسه، موضحًا: "طلعت علي شائعات كتير أوي عن وفاتي.. وفي مرة طلعت عليا شائعة وكان تليفوني مقفول والشائعة انتشرت جدًا، وفي ناس كتير حتى من العائلة صدقت فتأثرت أوي.. وقررت أعمل قصيدة رثاء وقال:
"لما مت عملتوا إيه؟!
كان نفسي أشوفكم
بس ماقدرتش أشوف لأني مت
بس وحياة ميتينكوا
والكلام بيني وبينكوا لما مت زعلتوا عليا قد إيه؟
يوم.. يومين تلاتة بالكتير مش بلومكم
دا أنا عايزكوا تعيشوا يومكم
صدقوني يومين كتير كفايه يوم.. أو نص يوم أو ربع يوم
أوربع ساعة فقط لا غير مش مهم
المهم لما تشوفوا صورتي أو تيجي سيرتي.. تذكروني
تذكروني بكل خير
وحبذا لو كانت الذكرى بدموع
أوشحتفة أوحشرجة أونهنهة
قصدي خلوا الحالة تبدو إنها
حزن فاق كل الآفاق
في قلب من ألم الفراق موجوع
اقرأ أيضًا: محمد عبدالحليم: عادل إمام بييجي يزورني ومبقتش عارف أنام من التليفونات
واعوا تنسوا.. اذكروا محاسن موتاكم ولو مفيش
ألفولي حبة محاسن واذكروها
واكتبوها على صورتي وشيروها
أو لما تيجي سيرتي اسكتوا
اسكتوا وغيروا الموضوع
غيروا الموضوع لأني
للأسف.. لسه حي
لسه بهرب م اللي فات
لسه خايف م اللي جاي".
