تامر حسني يوجه رسالة لطلاب الثانوية: ”جه دوركوا إنكم تفرحوا أهاليكم .. بالتوفيق يا أمل مصر”

وجه النجم تامر حسني، رسالة دعم لطلاب الثانوية العامة بالإسكندرية، وتمنى لهم التوفيق والنجاح.

وشارك الفنان تامر حسني، مع متابعه عبر حسابه الشخصي على موقع التواصل الاجتماعي "إنستجرام"، مقطع فيديو للطلاب ويظهر خلاله محبتهم الشديدة له، وكتب تامر معلقا عليه: "طلاب وأساتذة الثانوية العامة الإسكندرية، مش عارف أقولكوا قد إيه فرحت بكلامكوا وباللي شوفته في الڤيديو من محبة صادقة وتأثير صادق وحقيقي بينا، شكراً لكل طالب حس كلمة إيجابية مني وأثرت فيه سواء في كلامي أو أفلامي أو أغانيا وشكرا لكل مدرس حط رسايلي الصادقة ليكم في عين الاعتبار وخاطبكم بها، وحمدًا لله إن علاقتنا مش مجرد فنان وجمهور لا دي أكبر من كدا بكتير ودي العلاقة اللي حلمت بيها من صغري، بقدر الإمكان بخرجلكم من رحلتي كل ماهو إيجابي ليكم من نصيحة أخ الى كلمه تحفيزية واللي جاي مني ليكم اكتر وأحلى بإذن الله وواثق إنه هيوصل قلوبكم عشان زي ما قولتلكوا زمان اللي بيطلع من القلب بيوصل للقلب".

وأضاف: "شكرا شكرا طلاب إسكندرية وشعب إسكندرية العظيم شكرا شباب مصر أم الدنيا يارب.. كلكم ناجحين واللي عنده خطأ يصلحه الحياه لسه قدامكم والوقت لسه في إيدكم اي صعب هيعدي و بكرا تنجحوا و تبقوا أصحاب قصص حياه جميله كل واحد فيكم لازم يبقى بطل في قصة حياته عشان كدا متزعلوش من أي صعب وأي أخطاء وأي فشل في أي اتجاه، الحياه رحله ومشوار طويل مش موقف ولا موقفين والحل الوحيد إننا ننجح و نعتمد على نفسنا وتتعلموا إنكم متسندوش على أشخاص عشان لو مشيوا متقعوش اسندوا على، أولاً إيمانكوا بربنا دا أهم و أقوى سند تاني حاجه اسندوا على حلمكم و مجهودكم و نجاحكم اسندوا على قوتكم إنتوا، وهقولهالكوا تاني إحنا في زمن صعب لو احتاجت إيد تسندك وتدفيك امسك إيدك التانيه برغم إن في كتير طيبين بس الحياه تلاهي واللي سندك مره مش هيسندك التانيه".

وتابع: "وكمان جه دوركوا إنكم تفرحوا أهاليكم و تكونوا إنتوا سندهم عشان لما بيكبروا هما اللي قلوبهم بتتحول قلوب أطفال و بتحتاج رعايه منكم إنتوا بيبقوا محتاجين إنكم تردولهم اللي عملوه معاكم وإنتوا صغيرين.. معلش طولت عليكم و عارف إن من سمات العصر إنكم مش بتحبوا تقروا الكلام الكتير".

واختتم المطرب تامر حسني رسالته قائلا: "بس أنا عارف كلامي رايح لمين رايح للّي محتاجينه و مستنيينه فاهيقروه كويس جدا.. عشان من كل قلبي لحبايب قلبي وإن شاء الله هشوفكوا قريب.. بالتوفيق يا أمل مصر".

اقرأ أيضًا: «بالدولارات».. خالد عليش يحتفل بعيد ميلاده مع زوجته.. صور وفيديو