شيرين عبد الوهاب تثير الجدل: «مكملتش تعليمي.. وكنت فاكرة بنتي ولد»
ردت الفنانة شيرين عبد الوهاب، على مجموعة جديدة من الاسئلة والتي آدت إلى تصدر اسمها تريند «جوجل». وذلك عقب حديثها عن الفنانة أمال ماهر وعن زوجها السابق حسام حبيب.
«الطريق»، يرصد تصريحات شيرين عبد الوهاب، الجديدة عبر حسابها على «إنستجرام».. وإليكم اسئلة الجمهور ورد شيرين في السطور التالية:
رأيك في قضية أمال ماهر؟
يا جماعة الموضوع ده حساس وخاص، بالذات إني اتأذيت في حياتي الشخصية واتقال عني كلام كتير غلط، فأنا مقدرش اتدخل في موضوع خاص. بس أمال ماهر لو طلبت عيني اديهالها، احنا ايه عرفنا إن في مشاكل كل ده كلام بيتقال من غير إثبات خصوصًا إن أهلها قالوا إن مفيش مشاكل وإن أمال زي الفن ويارب تبقى زي الفل والنقابة كمان أكدت كلام أهلها إن مفيش مشاكل.
ما أكثر شيء تحبين فعله مع بناتك؟
إن احنا نقعد نرسم لوحة ونلونها مع بعض أو أي حاجة يدوية بنفرح بيها لما بتخلص.
مش كبرياء لكن بصلح كل شيء فيا انكسر.. كيف نصلح الذي كُسر؟
بنصلح اللي انكسر لما بنتعلم من الأخطاء اللي فاتت اللي اتكسر سهل يتصلح عشان احنا مش ازاز، احنا بشر ولازم نتعلم من اخطاءنا، هنا نبقى صلحنا اللي اتكسر.
هل تدعمين حقوق المرأة؟
طبعًا أنا ست وأكيد طبعًا بدعم المرأة في كل قضياها وده الكلام اللي قولته مع الأستاذة إسعاد يونس إن احنا أقوياء وإني بدعم المرأة في كل قضياها.
انتي وسعد لمجرد يوجد خلاف بينكما؟
خالص ليه، أنا ببارك ليهم على الدويتو الجديد، مبروك إليسا مبروك سعد.
ما رأيك بقضية نيرة أشرف؟
أنا نفسيًا الدكتور منعني من متابعة أي أخبار سلبية ومش بتابع أي أخبار كدة لأني حساسة جدًا وبتأثر بالأخبار دي جدًا بس ربنا يصبر أهلها ويحتسبها في الجنة إن شاء الله.
من هو أكثر موسيقار تحبيه؟
دول كتير أوي، الأستاذ محمد عبد الوهاب وبليغ حمدي وكمال الطويل ومحمد الموجي ومحمد فوزي وأستاذ فريد ومحمد فوزي وأستاذ عمر خيرت وناس تانية كتير أوي صعب أكتبهم كلهم.
كلمة عن الست أم كلثوم..
كوكب الشرق بمعنى الكلمة يعني مفيش لقب أفخم من كدة.
كم كان عمرك عندما بدأتِ في الغناء؟
تقريبًا 6 سنوات.
عمرك ركبتي خيل؟
أبويا كان بيركبني خيل زمان بس دلوقتي بخاف عشان ضهري بس أنا عندي حصان بهي عشان ولادي باخدوا دروس فروسية ومريم متفوقة جدًا فيها وأنا بحب الخيل جدًا.
أغنية لحد غيرك لما بتسمعيها بتدمعي..
أغنية ليالينا لوردة لازم أدمع.
شيرين هل يوجد خلال بينك وبين عاصي الحلاني؟
عاصي ده اخويا الكبير وبيشلني في عينه لما بنروح لبنان وبنروح عنده كمان مزرعة الخيل، والحقيقة أنا معنديش أي خلاف بين زميلة أو زميل كلهم حبايبي وزمايلي واتمنالهم الخير.
هل ندمتِ في يوم من الأيام على دخولك الوسط الفني؟
بصراحة ساعات، بس مش ندم له علاقة بالفن بس ليه علاقة بالمشاكل اللي بتيجي بسبب الشهرة، وكل مجال له إيجابياته وسلبياته.
ما هو مؤهلك الدراسي؟
للأسف لسه مخلصتش دراسة في أكاديمية الفنون عشان الدنيا خدتني والدنيا خدتني بس في أمثال كتير في الدنيا خلصوا دراستهم لما كبروا وبالمناسبة ببارك لصديقي الشاعر والسيناريست الكبير اوي أيمن بهجت قمر على إنه لسه مخلص دراسته، ألف مبروك يا أيمن يا مجتهد.
اقرأ أيضًا: شيرين عبد الوهاب: «فعلت مصيبة ولن أنساها.. واللي يزعل بناتي هموته»
عمرك فكرتي تخلفي ولد؟
أنا اصلًا كنت فاكرة مريم بنتي ولد واستغربت جدًا بس أنا بحمد ربنا على مريم وهنا عشان اللي مخلفش بنات يبقى مخلفش.
هل حسام حبيب فعلا مثلما يقال أنه سرق فلوسك؟
بصراحة حق الله إن حسام عمره ما أخد مني فلوس ولا استفاد مني ماديا، بل بالعكس تماما أنا معرفتش أحوش فلوس ليا غير لما اتجوزت حسام.. بعكس اللي بيتقال تماما هو كان بيحافظ ليا على مالي ودي الصراحة.. علشان دي حاجة هتسأل عليها قدام ربنا ودي الحقيقة.
