بسبب فيلم «بحبك».. خناقة بين محبي تامر حسني ومنتقديه
ذكرت الشركة الموزعة لأحدث أعمال الفنان تامر حسني فيلم «بحبك»، أنه حقق 100 مليون جنيه في ثالث أيام العيد في مصر والدول العربية، وفي الوقت نفسه تصاعدت حدّة الخلافات بين محبي تامر ومنتقديه، ووصلت إلى التراشق بالمنشورات وتبادل الاتهامات عبر موقع «فيس بوك».
موقع «الطريق»، يرصد عددًا من آراء الجمهور في الفيلم:
ردود فعل الجمهور على فيلم بحبك
انتقدت إحدى المشاهدات لفيلم «بحبك»، دور تامر حسني وكتبت عبر حسابها بموقع «فيسبوك»: «أنا مش عارفة تامر مش عايز يعترف فيلمه فشل ليه معرفش كل الجمهور اللي بعت لتامر حسني أو هنا زاهد، كلهم أقل من عشرين سنة، واللي دخل الفيلم فوق عشرين سنة كلهم قالوا مش حلو، الصحافة كلها منزله كومنتات كلها سلبية وبيقول هيكرر التجربه تاني للأسف لو عمل تجربة الإخراج تاني بجد تامر مش هنشوفه تاني في السينما».
وتابعت: «حفظنا القصص بتاعته عايزين تامر بقى الأب تامر بقى راجل كبير مش لسه عايشين في زمن المراهقة أنا عايزة بس أقوله يا تامر انت عندك 45 سنه يعني مفروض تعمل اجزاء عمر وسلمى هو وبناته وهما في الجامعه مش لسه بتحب وايه بتحب هنا زاهد وهدي المفتي، كان على أيامهم فيلم عمر وسلمى كان عندهم 16 سنه، للأسف راجع نفسك لو سمحت، أنا من الفانز بتوعك بس للأسف مش حلو فيلم قصة مهروسة من أيام السبعينيات».
اقرأ أيضًا: بعد نجاح «غلبان».. تفاصيل ألبوم أصالة الجديد والمشاركين به| خاص
ورد عدد من الفتيات على انتقاد الفتاة التي شاهدت فيلم «بحبك»، وكتبوا لها: «إيه يا جماعة الغل ده الفيلم حلو جدًا».
وكتبت أخرى: «حتى لو دا رأيك عادي اختلاف الآراء تحترم بس إنتي مستفزه أوي».
وكتب أحد جمهور تامر حسني، ردًا على الانتقاد: «مش فاهم يعني هو 45 سنه خلاص كدا يموت ولا إيه إذا كان أولاده في الحقيقة لسه أطفال، وهنا الزاهد نفسها متجوزة أحمد فهمي، وسنه مش كبير على فكرة، معظم ممثلين هوليود معدين الخمسين وبيعملوا أفلام رومانسية عادي مش عايشن في العصر الحجرى، وإن اللي يعدي الـ40 يبقى عجز، أنا متفرجتش علي الفيلم لسه بس اللي أعرفه اللي مش عجبه حاجة ميشوفهاش مش يقعد يتكلم عليها ليل ونهار ممكن الفيلم يعجب حد تاني دي أذواق وربنا نفسي نفهم النقطه دي كويس والحمد لله إن زمان مكنش في سوشيال ميديا كان زمنها باظت».
كما علق الناقد الفني أندرو محسن، على استهزاء تامر حسني من السيدات في أعماله، وكتب عبر حسابه بموقع «فيسبوك»: «تامر حسني في فيلم بحبك بيستمر في هوايته في السخرية من الستات وتقديم الشخصيات النسائية في شكل سطحي يصل إلى حد التفاهة، والصراحة مابقتش أستغرب من اختياراته دي، لأنها مرضية لشريحة كبيرة من المجتمع، لكن باستغرب من إن فيه ممثلات بيقبلوا يعملوا شخصيات بالشكل ده ومن غير أي مبرر درامي».
واستكمل حديثه، وقال: «في الفيلم علي تامر بيقابل حبيبة هنا الزاهد، وفي أول لقاء بيسخر منها بكل الطرق الممكنة وغير الممكنة، ومع ذلك -طبعًا- بتقع في حبه وبتضحك هي وأصحابها كمان من اللي بيقوله عليها، في مشهد بعد كده علي واقف مع حبيبة وبيبدأ وصلة جديدة من التنمر فهي بتقوله إنها هتديله بالجزمة فبيقولها يلا أنا موافق حاجه تضحك أوي فبتوطي فعلًا عشان تقلع الجزمة، وبتكون لابسة جزمة ليها كذا أبزيم ويا حرام عشان هي بنت مش عارفه تفك الأبزيم بتاع جزمتها وبتقوله أصلي رابطاه أوي فعلي عشان راجل جدًا بيوطي يساعدها عشان تقلع الجزمة وفجأة يقوم بايسها! عادي كده، والمفروض إن ده مش تحرش لا ده حب».
وأضاف: «أقصى رد فعل من حبيبة إنها لما بتشوفه تاني جوه المطعم بتقلب عليه صينية أكل فبيروح بايسها تاني ويقولها بعتاب: إيه الشرب ده كله؟ وده عشان هو راجل برضه، فعادي يتحرش بيها لكن من الرجولة إنه لما يشوفها بتشرب يقولها إن كده غلط، طبعًا مش محتاج أقول إن حبيبة بعد وصلات التحرش والتنمر والسخرية حبته».
اقرأ أيضًا: حقيقة خطوبة نرمين الفقي من رجل أعمال.. لن تصدق كم عمرها الآن
كيف كان رد تامر حسني على خناقات جمهوره؟
لم يُعلق تامر حسني، على هذه المشادات الكلامية بين جمهوره من الفتيات والشباب، وكذلك لم يرد على الانتقادات بل اكتفى أن يرد على ردود الأفعال الإيجابية فقط وابرازها، بجانب اهتمامه بعد إيراداته التي وصلت إلى 100 مليون جنيه حسبما ذكرت شركة توزيع فيلم «بحبك».
فيلم «بحبك»
وتدور أحداث فيلم «بحبك» بين الكوميدي والرومانسي، من خلال شاب يقع في حب فتاتين مرة واحدة، وتضطره الظروف للوقوع في عدد من المشاهد الكوميدية والرومانسية.
فيلم «بحبك»، تأليف وإخراج تامر حسني في أولى تجاربه بالإخراج السينمائي، وبطولة تامر حسني، هنا الزاهد، حمدي الميرغني، هدى المفتي، أحمد عزمي، مدحت تيخة، عمرو صحصاح، شهد الشاطر، عالية راشد، وعدد آخر من الفنانين.
اقرأ أيضًا: بهذا الرقم.. فيلم «بحبك» يحتل المركز الثاني بإيرادات أفلام العيد
