نص أقوال «ملكة جمال اللطافة» بعد خطفها والاعتداء عليها
قررت النيابة العامة، إحالة المتهم بخطف الفائزة بلقب ملكة جمال اللطافة والأناقة العالمية من على الريد كاربت وخطيبة أحد الإعلاميين ومقدم مهرجان شهير الإذاعة والتليفزيون والاعتداء عليها إلى محكمة الجنايات المختصة.
وجاء في أقوال المجني عليها أمام النيابة العامة بعد سؤالها:
س: ما تفصيلات بلاغك؟
ج: اللي حصل أنا كنت مدعوة في مهرجان الإذاعة والتليفزيون المصري الذي أقيم بمسرح طيبا مول اللي في مدينة نصر، بصفتي حاصلة على لقب ملكة اللطافة بمسابقة ملكة الأناقة العالمية، ويوم حفل الختام للمهرجان أنا روحت الساعة الخامسة مساء، والمهرجان ده خطيبي مذيع بقناة شهيرة هو اللي كان هيقدم الحفل الختامي، وقابلته في أثناء فاعليات المهرجان.
وأضافت أمام النيابة العامة، خطيبي كان معاه واحد صاحبه فوقفت معاهم، وسلمنا على بعض، وأنا كنت شوفت صاحبه ده قبل كده مع خطيبي، وسابنا علشان يشوف شغله، وفضل لازقلي وقعد يقولي أنا عايز أتصور معاكي، واتصور معايا على الريد كاربت، وبعد كده قالي هاتي إيدك أمسكها عادي فأنا مرضيتش وخليت المصورين يمسحوا الصور، وبعد ما قعدنا على الترابيزة، فجأة واحدة أعرفها من الميديا شافتني في الكافيتريا، فلقيتها بتطلب تتصور معايا وعلشان أنا معرفهاش قوي جات تسلم عليا وطلبت رقمي فأنا مليتها رقم موبايل وفوجئت بصاحب خطيبي بيسجل الرقم كمان وبعتلي رسالة وهو كتب الرقم على موبايله.
وتابعت: أنا قولتله أنت ليه أخدت رقمي فقالي علشان لو عوزتي حاجة تكلميني في أي وقت فأنا قمت مسحت رقمه وبعد كده جه خطيبي ونادى علی صاحبه وخده على جنب وبعد كده جالي صاحب خطيبي تاني وقعد يقولي قد إيه هو معاه فلوس وأنه دفع لخطيبي فلوس الحلاق هشام ربيع عشان يظبطوا قبل المهرجان وأن خطيبي لما أخده على جنب طلب منه الحزام الكلاسيك بتاعه، وبعد كده دخلنا المسرح، وأنا قعدت على الكرسي بتاعي في الصف الثاني وبعدين لقيت صاحب خطيبي جه قعد جنبي بعد ما شاور لخطيبي أنه يعديه عند كراسي ال «في أي بي» وجه قالي معلش أصلي معرفش حد غيرك، فلما خطيبي شافه من على المسرح نزل قالي قربي وقالي هو ليه قعد جنبك قولتله هو اللي جه أنا معرفش، وبعد كده نادى على صاحبه وقاله مرات أخوك خلي بالك منها، فقاله دي في عينيا، والمهرجان ابتدی وکرموني.
وواصلت: بعد ما المهرجان خلص طلعت بره وكان معايا بنوتة من الميديا وصاحب خطيبي اتعرف عليها، واخد رقمها، وبعدين لقيت صاحب خطيبي قالي هاتي تليفونك وراح كتب رقمه واتصل بيه، وسألني قالي هو ده رقم غير بتاع الواتس آب علشان أنا كلمت الرقم بتاع الواتس آب لقيته مقفول.
وقالي إن خطيبي قالي امشيكي بشياكة فحاولت استفهم منه، فقالي امشي بس دلوقتي وأنا هكلمك أفهمك، أنا روحت مشیت واتصلت بخطيبي لقيت موبايله مقفول، وأخدت عربيتي وبنت الميديا علشان أوصلها، ووصلتها محطة مترو كلية البنات، وأنا بوصلها لقيت صاحب خطيبي بيتصل بيا، ورديت عليه فسألني عن مكاني، وهروح فين، فقولتله أنا راجعة الزقازيق، فسألني هروح الزقازيق منين، ولما عرف إني برجع من طريق السويس طلب مني إني بعد ما أعدي كارتة مدينتي أستناه عند البنزينة اللي بعد البوابة على طول على اليمين، واستفسرت عن السبب اللي عايز يقابلني بسببه فقالي إن خطيبي في مشكلة كبيرة ومصيبة وأنه هيحكيلي لما يشوفني وقعد يتابع معايا وأنا في الطريق لحد ما عديت الكارته، بوابة تحصيل الرسوم، لقيته كلمني قالي أنا شوفت عربيتك أقفي على جنب، فعدى جنبي وقالي أمشي ورايا، مشيت وراح لحد ما وصلنا مدينتي عند لابوار.
وأكملت: نزل من العربية وقالي تعالي نقعد جوه فالمكان كان مقفول، راح قالي أنا أعرف الناس اللي هنا كلها ودخلنا وجابلي قهوة وقعدنا وسألته في إيه، راح قالي أن موبايله فصل، فقالي تعالي نروح على البيت زي ما خطيبك قالي فأنا رفضت، وهو قالي أن خطيبي قاله يكلمني ويخليها تسبقني على البيت وقالي إن خطيبي زمانه وصل البيت فروحت معاه ولما وصلت عملت تحديث للعنوان وبعت لنفسي لوكيشين وفضلت قاعدة في العربية، ولقيت صاحب خطيبي بيقولي إن النور والع قولتله هو خطيبي معاه المفتاح فقالي أيوه، فقولتله أنا هكلمه ولقيت موبايله لسه مقفول، فقالي أكيد ماشحنهوش أو أخد الواصلة البايظه اللي معاه، فنزلت من العربية بصيت على عربية خطيبي ملقيتهاش، فقولتله أمال فين عربيته قالي هتلاقيه راكنها بعيد، وهو كمان ركن بعيد فسألته ليه قالي علشان محدش من أصحابنا يعرف أن إحنا هنا، فقولتله خلاص اطلع أنت وإديني خطيبي على التليفون وأنا أطلع، راح قالي حاضر ودخل العمارة غاب خمس دقايق وجه قالي إن خطيبي لسه مجاش، وقالي اطلعي استنيه أحسن، فأنا رفضت، وقولتله أنا هستنى خطيبي في بنزينة شيل أوت اللي بعد البوابات بتاعة كارفور ولما ييجي بلغه، وروحت أركب عربيتي لقيتها عطلت مش بتدور، فروحت معاه بعربيته على هناك ودخلنا محل ماستر وشربنا قهوة.
خلال الوقت ده طلع عمل مكالمة ورجع قالي محمد وصل البيت وموبايله فصل على طول يلا نروحله، وقعدت أحاول أكلمه ولكن موبايله مقفول، وقولتله اطلع واديني خطيبي على التليفون فطلع ونزل قالي إن خطيبك تعبان وصمم إني أطلع وقعد يقولي أنا أصلا سيبكم لوحدكم وهروح أنا الرحاب، وفي الآخر وبعد تردد طلعت، فتح الباب فدخل ونادى على خطيبي وردد خطيبتك جت، فضلت أنده فقالي ما تخشي بقى، وزقني جوه الشقة، وقفل الباب بالمفتاح وشال المفتاح في جيبه، فأنا خوفت وقولتله هو خطيبي فين قالي خطيبك مش جاي أصلا، وقالي بالذوق كده لحد ما أخش أعلق الجاكيت اقلعي جزمتك بالذوق واقعدي بدل ماجي أقلعهالك بالعافية فجريت على باب الشقة وقولتله افتح علشان ما عملكش مصيبة، قالي لو قعدتي تصوتي من هنا للصبح محدش هيلحقك.
وأضافت: حاولت أتصل بحد بالتليفون علشان ينجدني راح أخد مني التليفون وضربني بالقلم ووقعني على الكنبة، وجه بعد كده قالي أنا آسف إزاي عملت كده وقرب مني وحط إيده على شعري وقعد يبوس على شعري ويتأسف، وقالي أنا مش هعملك حاجة وتعالي نلعب لعبة، واداني تليفوني وفاتحة بالعافية وقالي نتكلم واتساب أحسن، لقيته باعتلي على الواتساب أنا زعلان منك ، فقلت له بصوتي ليه فقالي كلميني على الوتس آب أحسن، فكتبت له ليه فقالي إنتي عارفة.
طلعت من الشات علشان أحوال أكلم حد فسحب مني التليفون وقالي مش أنا قولتلك متكلميش حد وشدني من شعري وقالي أنتي واضح أنك عاوزة أتعامل بالعنف فقولتله هلم عليك الناس وعلى البلكونة وحاولت أفتحها فشدني من شعري ووقعني على الأرض وشالني وحطني على الكنبة وقلعني الجزمة وقالي إن تليفون صاحبك اتفتح خلينا نشوف هو فين وعمل التليفون بتاعي وضع طيران وكلم خطيبي قاله أنت فين فقاله وصلت الرحاب مع صاحبتي قاله تمام وقفلوا المكالمة.
وتابعت، قالي أنا هولع جب سيجارة حشيش فقولتله أني مبشربش أنا عندي مزق على الرئة فقالي أنتي مبتشربيش فقلت له أنا بشرب سجاير خفيفة وأنا مش عايزة أشرب خالص فقالي أيوه واضح أنك مش بتشربي بس أنتي بالعافية هتشربي، فجابني من شعري وحاول يحط السيجارة في بقي وأنا مرضتش فراح ضربني بالقلم على وشي وكتفيني ودخلني على الأوضة، حاولت أقاومه فراح مقلعني البلطوا بالعافية وبعد كده حاولت أجيب أي حاجة من على التسريحة علشان أخبطه بيها لأنه كان بيحاول يقلعني باقي هدومي فقالي أنت مفيش فايدة وضربني بقلم ثاني على وشي ووقعت على طرف السرير وهو رفعني على السرير من جوه وحاول يقلعني البلوفر أنا فضلت ماسكة في البلوفر فقطعه وكتف إيدي الاثنين بإيده ووقعد يضربني على وشي بإيده الثانية وأنا دخت خالص وقالي أنتي مش هتيجي برضوا إلا بالعافية وضربني بظهر ايده على وشي واعتدى عليا.
اقرأ أيضا: الأول قتيل والثاني ينتظره عشماوي.. فتنة الزوجات تكتب حلقة جديدة لجرائم «قابيل وهابيل»
