فاروق فلوكس يكشف أسرار لأول مرة عن فترة انضمامه لجماعة الإخوان.. (فيديو)

كشف الفنان فاروق فلوكس كواليس فترة انضمامه لجماعة الإخوان، موضحًا أن الغرض من الانضمام لم يكن عدواني، إلى جانب حديثه عن سبب تسميته بهذا الاسم.

تحدث فاروق فلوكس خلال لقاءه في برنامج "الستات" عن فترة انضمامه للإخوان، قائلًا: "لما كان عندي 5 سنين كنت ساكن في ميدان عابدين، وكانوا الإخوان بيمشوا لابسين لبس الكشافة وكان عاجبني الشكل ده وقولت أنا عايز أبقى معاهم".

وأضاف: "في الشارع اللي بعدنا كان ليهم مكان، وقولت لوالدي عايز أنضم ليهم عشان أمشي في الطابور ده، قالي أعمل اللي انت عايزة واللي شايفة صح اعمله، ولو لاقيت غلط أو حسيت بخطر تعالي قولي".

لقاء فاروق فلوكس وحسن البنا

وتابع: "لما انضميت ليهم لقيتهم بيحفظونا قرآن ويقعدونا شوية، وبعدين قولت أنا عايز أستلم اللبس، قالولي هنحضر خطبة للشيخ حسن البنا، ورحنا مقرهم الأساسي في الدرب الأحمر، ومكنتش عارف أى حاجة وكان همي اللبس وبس، حسن البنا ده إنسان طويل ولابس طربوش وبالطو وصوته جهور، وكان بيقول حاجات أنا مش مُلم بيها بس كان فيها آيات قرآنية وأنا بحب الدين".

فاروق فلوكس يتحدث عن تدريبات الإخوان

وكشف عن كواليس تدريبات الإخوان، مضيفًا: "نزلونا بدروم كان كله رمل وسلك شائك، وإدونا عصاية غلية وقالوا ازحفوا على الرمل وعدوا من تحت السلك، وأنا مبحبش حد يفرض رأيه عليا لإن دي مش شخصيتي، وعملت الترجبة الأولى وأنا متضايق والسلك الشائك شد هدومي، ولما خرجنا قولتلهم هروح أنضف هدومي وأجي تاني ورحت حكيت لوالدي وقولتله مش هروح تاني وفعلًا مرحتش".

واختتم حديثه، قائلًا: "لما بعتوا يجبوني قولتلهم أنا مش عايز أجي، وصحتي مش هتسمح، وفضلت بكره هذا المكان لحد ثانوي، وساعتها اتعرفت على واحد كان كل ما الآذان يأذن يقولي يالا.. طيب أنت مالك؟ انت عارف أنا متوضي ولا لا؟، كنت بقوله لا مش هاجي، وعرفت إنه من الإخوان لما كنا بنعمل مظاهرات في المدارس وكان البوليس بيجي يضرب علينا قنابل مسيلة للدموع، لقيته بيجيب جردل فيه رمل وبيتسقبل القنابل، طب هو عرف الكلام ده منين؟، ده معانا في المدرسة يعني مين اللي علمه كده؟، ساعتها عرفت إنه مع الإخوان وأنا مش صغري مش بحب الناس دي.

فاروق فلوكس يكشف سبب هذا الاسم

كما كشف الفنان فاروق فلوكس عن سبب تسميته باسم فلوكس، مؤكدًا أن صديقه هو الذي أطلق عليه هذا الاسم، قائلًا: "اسمي الحقيقي فاروق توفيق صالح مبارك، كان في واحد من كلية دار العلوم كنت بقول عليه الأقرع، فجري ورايا وقالي يا فلوكس، ومن ساعتها الكلمة مسكت فيا، وبعد كده عرفت من الشاعر أحمد رامي معنى الكلمة قالي ده أحد أسماء الأسد وهو أيضًا النبات الذي بينبت في المياه الراكدة".