لينا صوفيا في حوارها لـ «الطريق»: «إسعاد يونس طول عمرها موجودة في بيتي ونفسي أقدم دور شعبي»
- قعدت سنتين مكتئبة لما مكنتش بمثل
- أول مرة شوفت إسعاد يونس عيطت
- فرحت لما جالي دور النزوة لإنه جديد عليا
- نفسي أمثل مع ماجد الكدواني ومنة شلبي ويسرا ومنى زكي
تألقت الفنانة الشابة لينا صوفيا في عدة أدوار مختلفة منذ أن كانت في سن صغير وأسست لنفسها قاعدة كبيرة من الجمهور، حيث شاركت في عدة أعمال، أهمها: هيبتا، بالحجم العائلي، النزوة، قواعد الطلاق ال 45.
حاورت جريدة وموقع "الطريق" الفنانة لينا صوفيا وكشفت عن تفاصيل الأعمال التي شاركت بها والدور الذي تتمنى أن تقدمه.
وإلى نص الحوار:-
-
في البداية.. كلمينا عن دورك في مسلسل كامل العدد؟
أنا بقدم دور فريدة عندها 17 سنة وهى بنت مغلقة على نفسها ومبتقولش كل اللي جواها، وبتحس بالأمومة لإخواتها بعد وفاة والدتها ومش بتحس إن والدها مهتم بيها كفاية ومبتبقاش قادرة تصدق إزاي والدها يعمل فيها كده.
-
ما وجه الشبه بينك وبين شخصية فريدة؟
فريدة بنت حساسة جدًا وأنا كمان كده، وكمان هى بتحب أخواتها قوي وأنا كمان متعلقة بيهم جدًا، هما دول بس الحاجات المشتركة بينا.
-
مين اللي رشحك لدور فريدة؟
أنا عملت أوديشن عادي وبعدين طلبوني تاني وعملت أوديشن مع الأستاذ خالد الحلفاوي المخرج.
-
كيف العمل مع دينا الشربيني وشريف سلامة؟
الشغل معاهم حلو قوي، كنت حاسه بجد إنهم بابا وماما ودينا بحس إنها زى ماما كده ومرة خرجتها وجابتلنا فساتين وهى طيبة جدًا وتستاهل كل الحب في الدنيا، وشريف سلامة من أطيب الناس وأكتر الناس المحترمة في الدنيا ودمه خفيف جدًا زى الشخصية اللي هو بيقدمها.
-
كيف كان الوقوف أمام الفنانة الكبيرة إسعاد يونس؟
أول مرة شوفت إسعاد يونس عيطت، لإني كنت ساكنة في تونس قبل كده عشان شغل والدي وبرنامج صاحبة السعادة كنا دايمًا بنتفرج عليه عشان نتعلم عربي، وهى طول عمرها كانت موجودة في بيتي ومش فاكرة وقت أنا مكنتش أعرف فيه إسعاد يونس، وعيطت لإنى بحس إنها من عيلتي وهى طيبة ومحترمة جدًا وكل الناس بتحبها.
-
دورك في مسلسل النزوة كان جرئ جدًا، إزاى استعديتي للدور ده؟
لما جالي الدور فرحت جدًا، لإني كنت هعمل دور مختلف عن الأدوار اللي قدمتها والدور كان مليان مشاكل لإنها بنت وحامل في سن صغير، واتمرنت على الدور لوحدي وقرأت الورق أكثر من مرة وكنت خايفة بس التمثيل كان سهل عشان أستاذ خالد النبوي وسالي شاهين تمثيلهم رائع وبيخلي اللي قدامهم يمثل أحسن.
-
مين من الفنانين نفسك تمثلي معاه؟
أنا مثلت مع أغلب الفنانين اللي كان نفسي أمثل معاهم، بس لسه فيه ناس كتير زى أستاذ ماجد الكدواني، منة شلبي، منى زكي، يسرا، وطبعًا مش عايزة أنسى حد بس فيه ناس كتير نفسي أمثل معاها.
-
ايه الدور اللي نفسك تقدميه؟
بحب دايمًا أقدم الأدوار اللي مش شبهي في الحقيقية وملهاش علاقة بيا، ونفسي أعمل دور شعبي.
-
في فيلم هيبتا سنك كان صغير جدًا وكنتي أول مرة تمثلي، مين اللي ساعدك في الدور؟
ساعتها كان عندي 7 سنين، ولما عملت أوديشن وجالي الدور، أستاذة مروة جبريل إدتني أساسيات التمثيل، زى مثلًا لما أكون بتكلم مع حد لازم أبص في عينه، واكتشفت التمثيل في هيبتا واتمرنت مع أستاذة مروة.
-
هل فكرتي تختفي فترة عن التمثيل حتى يستطيع الجمهور التفرقة بين شكلك وإنتي صغيرة ولما كبرتي مثلما فعل العديد من الفنانين؟
أنا بمثل من وأنا عندي 6 سنين ومن وقتها لحد دلوقتي شكلي اتغير جدًا، وشكلي ما بين هيبتا وبالحجم العائلي مختلف لما كنت في النزوة، والناس مش عارفة تحفظ شكلي ومش حاسه إني عايزة أوقف تمثيل أنا قعدت سنتين مش بمثل عشان مكنش ليا نصيب وكانوا أوحش سنتين في حياتي وكنت مكتئبة لإني التمثيل بيعالجني نفسيًا.
-
ماذا عن أعمالك الجديدة؟
مش بصور حاجة جديدة الفترة دي، لكن لسه مخلصة تصوير فيلم حسن المصري مع أحمد حاتم وكنا بنصور في لبنان بس لسه معرفش هيتعرض إمتي.
