رامي جمال يطلق حملة للتوعية عن «البهاق».. ويحيي حفل إحدى معجباته مجانًا
أطلق النجم رامي جمال، حملة للتوعية عن مرض البهاق وأسبابه، ويأتي ذلك عقب إعلانه عن إصابته بالبهاق منذ أيام، وكان قد وجه آنذاك سؤالًا لجمهوره عما إذا كان يتابع مسيرته الفنية، أو يعتزل الفن، الأمر الذي جعله يتلقى العديد من رسائل الدعم حول استكمال مسيرته الفنية، من خلال منصات السوشيال ميديا المختلفة، سواءًا كانت من داخل الوسط الفني أو من جمهوره.
وكانت إحدى معجباته علقت على إحدى منشوراته حول التوعية بـ"البهاق" خلال صفحته الرسمية على موقع تبادل الصور والفيديوهات انستجرام قائلة:"نفسي جدا اتعالج منه عشان مش كل ناس بتتعامل معاه انه مرض عادي في بيفكروا معدي واتعرضت لأكتر من موقف منهم ميكب ارتست يوم خطوبتي كانت خايفه اكون معديه وكانت عاوزة تستخدم ادوات تانية ليا مخصوصه عشان محدش يتعدي".
ليرد عليها "رامي" قائلًا:"الفتره الجايه مش هيحصل كده تاني وهنعرفهم عنه كل حاجه"، وتابع "جمال" قائلًا:" وانا هغني في فرحك هديه" في مفاجأة منه إحدى معجباته.
وكان رامي جمال قد كتب خلال مبادرته عبر صفحته الرسمية على موقع التواصل الاجتماعي الأشهر "فيسبوك" قائلًا:"البهاق تعالوا كل يوم نعرف حد حاجة عن الموضوع ده، أولا ده مش معدي، وده بيبقي نقص في الخلايا الصبغية وده مرض مناعي، لو اترفضت في شغل بسببه، ابعتلي ونعرف الناس اسم المكان اللي مفيهوش إنسانية، لو إنتي أو إنت اترفضتم من اللي هتتجوزوه بسببه إنتم الكسبانين اللي يبص علي لون جلدك قبل لون قلبك إنسان فاضي ميتعاشرش، لو في مدرسة وأصحابك مش فاهمين ده ايه متزعلش احنا نعرفهم ده ايه".
وتابع "جمال" قائلًا:"المدرسين يعرفوهم ده ايه، وأكيد هيقدرو ان ربنا ميزنا، البهاق مش مرض، البهاق ترجمة توتر وقلق وضغط فياريت كل الناس اللي عندها يبقي عندها الحظ اللي شفتوا منكم والدعم اللي شفتوا منكم، من ساعة ما كتبت والتليفزيون مبيتكلمش غير عليه، دكاترة جلدية مشكورين عرضوا علاجي، وأنا بقولكم كتير أولي مني بالعلاج المجاني".
