«مش ملزمة بتجبلهم حساسية».. نهاد أبو القمصان تثير الجدل من جديد
خرجت المحامية نهاد أبو القمصان، عضو المجلس القومي لحقوق الإنسان، لتثير الجدل من جديد حول تريند "الست مش ملزمة"، وذلك بعد تصريحاتها الأخيرة عن واجبات المرأة تجاه أسرتها، مخصصة أمر الرضاعة، إذ أن آيات سورتي البقرة والطلاق في القرآن الكريم، لم تجبر السيدات على إرضاع أولادهن، ولكن المفاجأة أن هذه الآراء انقلبت عليها وجعلتها في موضع النقد ليس من الرجال فقط بل أيضًا النساء.
ده مش إهانة للأمهات
قالت نهاد أبو القمصان: "أنا سعيدة جدًا بجو الأمومة المتفجرة في ربوع مصر كلها.. وسمعت درر عن الأم وقيمة الأم.. وأجر الرضاعة اللي جاي في القران"، متعجبه: "واللي طلع يقول إن الضرب جائز للأمهات بالسواك علشان نكسر كرامتها ونربيها علشان تبقا مطيعة لجوزها"، متسائله: "ده مش إهانة للأمهات".
ابقي افتكري أختك
وتابعت أبو القمصان في فيديو لها عبر موقع التواصل الاجتماعي "فيسبوك": "وفي ستات طالعين يقولوا إحنا سعداء واحنا بنرص محشي وبنعمل مكرونة بشاميل"، معقبة "أنا بردوا هبقا سعيدة لو حد رصلي محشي وعملي مكرونة بشاميل.. ابقي افتكري أختك لأن أنا مش فاضية".
الراجل متخيل إن ده حقه
وواصلت عضو المجلس القومي لحقوق الإنسان: "بروح المحكمة علشان أرجع مليون أم بعيالها اتكرموا أوي لدرجة أنهم مرميين في الشارع.. وفي عز الشتا العيال مش لاقيين هدوم".
وأضافت المحامية: "بجري ورا الستات اللي بتضرب ضرب نار وتترمي من البلكونات علشان الراجل متخيل إن ده حقه".
اقروا القرآن
واختتمت حديثها: "عايزين فقه جديد يحترم حقوق الإنسان ويتناسب مع العصر إحنا معاكم.. هتنقوا من القرآن الحتة اللي عجباكم هنقولكوا اقروا بقا القران يا جماعة.. صح ولا إيه؟".
أجر الرضاعة
والجدير بالذكر أن نهاد أبو القمصان قد أعربت عن اجر الرضاعة: "اللي بيقولولي مش فاهمين إيه موضوع أجر الرضاعة دا؟ ومناسبته إيه؟ هفهمكوا.. الراجل اللي بياخد حتة من القرآن ويسيب الباقي.. بنفكره بباقي القرآن لأن ربنا عادل والقرآن أنصف المرأة ومليان حقوق هنعرفها للستات كلها إن شاء الله".
اقرأ أيضًا.. «مش عاوزين أجر الرضاعة ومتنازلين عنه».. نهاد أبو القمصان تثير الجدل من جديد
