ميدو عادل: «سره الباتع» يحكي عن الناس المصرية الأصيلة..وخالد يوسف مبدع
حل الفنان ميدو عادل ضيفاً على أولي حلقات برنامج«نجوم رمضان اقربلك» مع المذيعه أنجي علي عبر راديو FM والذي يعرض من الساعه 10 مساءاً حتي الساعه 12 مساءاً مباشر.
وتحدث الفنان ميدو عن تفاصيل مشاركته في مسلسل"سره الباتع" ضمن السباق الرمضاني للمخرج الكبير خالد يوسف وبمشاركة الفنان الكبير احمد السعدني وحنان مطاوع.
وأعرب الفنان ميدو عادل عن حبه الشديد للفنان خالد النبوي قائلاً: أنا من الناس اللي بتحب خالد النبوي ومكنش فيه نصيب إن اشارك معاه في مسلسل الإمام الشافعي، كما أنني من عشاق اللغة العربية.
وعن مشاركته في مسلسل سره الباتع قال: مسلسل سره الباتع يناقش قضية مصرية مهمه عن المقاومة المصرية وروح الشعب، ودي السيرة اللي بنمشى ورا السلطان بتاعنا حامد اللي هو النجم الكبير أحمد السعدني، وفخور إني اتعرفت على أحمد السعدني.
وعن رأيه بالمشاركة مع الفنان أحمد السعدني قال: المسلسل فيه نجوم كبيرة جدًا بس أحمد السعدني هو البطل الدرامي لسره الباتع، بفرح بيه لإنه نجم شاب، والسعدني استغل نجومية بالشكل الفني الصحيح فقط مش بالشكل التجاري، وديه أزمة كبيرة في الوسط الفني، محمود الجندي كان خلافي معاه بقوله إن الوسط مش زي زمان محدش هيحترم تاريخك، السعدني إداني أمل، إن الخط اللي ماشي عليه مش غلط.
وأضاف ميدو: بشتغل من سن 3 سنوات ربنا قرر إني أشتغل فنان، يعني أنا 37 سنة شغال ممثل، وطبيعي أتفرج على كل الأعمال، وده بيساعدني بشكل عام وفي المهنة اني اكتسب خبرات أكتر.
واردف: المسلسل بيحكي عن الناس المصرية البسيطة، أحمد فهمي نجم شباك من الدرجة الأولى، وإنه يسيب كل المسلسلات اللي بتتعرض عليه ويقبل دور مختلف شابوه ليه جدًا، وإحنا مش بنحكي شيء واقعي دي شخصية خيالية، ومع نهاية المسلسل حامد زي الأبطال المصريين اللي بندور معاهم.
وعن مشاركته لأول مرة مع المخرج الكبير خالد يوسف قال: بعد ما قعدت مع أستاذ خالد قبلت الدور، وهو راجل مخلص، بمثل مسرح من وأنا عيل صغير، كنت قلقان بالعمل، مخرج مثقف جدًا بيحب شغله، طول الوقت بيلون نفسه، ودي حاجه غريبة جدًا، واتبسطت إن لقيته بينتقد نفسه طول الوقت، بنى آدم جاي يشتغل، ولما بيتعصب على حد بيروح يعتذر له.
وأختتم ميدو قائلاً: سره الباتع مسلسل مهم جدا و هيزدني فخر إن في تاريخي شاركت فيه، ومن عام 2010 إلى الآن عملت أكثر من 70 عملا منهم، 50 عملا راضي عنهم، وعملت 12 عملا ضيف شرف.
