بطريقة سهلة وبسيطة.. اعرف الإفتاء قدرت قيمة زكاة الفطر إزاي؟

أوضحت دار الإفتاء المصرية، تقدير قيمة زكاة الفطر بطريقة سهلة وبسبطة وبلغة عامية ميسرة، حتى يستطيع المسلمون إخراج الزكاة قبل صلاة العيد.

وقالت الإفتاء عبر صفحتها على موقع فيسبوك: "حسبناها على القمح اللى بيتعمل منه العيش اللى كل الناس فى مصر بتاكله لأن بيوت كتير مش بتاكل لا رز ولا تمر ولا زبيب، طيب سعر أردب القمح كام 1700 جنيه، والأردب فيه 150 كيلو".

أضافت الإفتاء: "يبقى سعر الكيلو كام 11.33 إحدى عشر جنيه وثلاثة وثلاثون قرشًا، طيب والزكاة أد ايه 2.04 كيلو، يبقى نضرب 2.04 كيلو * 11.33، يطلع الناتج 23.11".

وقالت دار الإفتاء: 30 جنيها يعني زودت كمان عن الحد الأدنى بشوية و30 جنيها الحد الأدنى يعني طلع أكتر من 30 جنيها لو معاك ودخلك يسمح لك، بس اللى مش هيقدر فأقل حاجه يطلعها عن الفرد 30 جنيها".

وتابعت: "طيب أنا شايف إن 30 جنيها قليل مش هتعمل حاجه يبقى تطلع ما ترضاه نفسك وتحس إنه له قيمه لكن لا تقل عن 30 جنيها ولا تلزم غيرك يطلع زيك لأن ممكن يكون غير قادرن وتخرج قبل صلاة العيد".

واختتمت الإفتاء: "ولو ملحقتش تطلعها ممكن تاخد برأي السادة الشافعية إنك ممكن تطلعها قبل غروب شمس يوم عيد الفطر".

وتستطلع دار الإفتاء المصرية غدا الخميس، هلال شهر شوال لعام 1444هجريا، وتحديد أول أيام عيد الفطر المبارك.