الحوادث

زوجة أمام محكمة الأسرة: بيضيع فلوسه على صبغ شعره واللبان

الإثنين، 31 يوليو 2023 12:35 مـ بتوقيت القاهرة

أقدمت سيدة تدعى "صباح" إلى محكمة الأسرة بالتجمع الخامس، لدعوى خلع من زوجها، موضحة سبب الدعوى ضياع أمواله على أمور شكلية، مثل: "صبغ شعره"، فضلا عن تناوله العلكة باستمرار.

محكمة الأسرة
قالت الزوجة في دعواها التي حملت رقم 2801 لسنة 2022: "تزوجت من (م.م)، 38 سنة، مهندس برمجيات، بعد قصة حب جميلة لأننا كنا جيران وعشت معاه أكثر من 3 سنين من غير أى خلفة، وانا بحمد ربنا على كده.

تروى الزوجة قصة زواجها: "زوجي كان راجل عنده نخوة وفيه رجوله الدنيا فى بداية جوازنا، كان بيتعامل معايا بكل رجولة والناس كانت بتضرب بيه المثل، وفجأة جالته فرصة سفر لدولة أجنبية، استمرت لمدة 8 شهور، وبعد ما رجع اتحول لكائن غريب أوى مش جوزى اللى أعرفه.

تستكمل الزوجة: "دخل زوجى البيت لاقيته لابس محزق وملزق هدوم متنفعش تلبسها بنت، وصابغ شعره وبياكل لبان وبيتمرقع زى الستات، وبعد مشادات بينا أخدت وقت كبير، ساب البيت ومشى بلا رجعة، طلبت منه الطلاق ورفض وبرر ده بإنه هيتجوز واحده تانية".

وتتابع الزوجة: "بعد ما تأكدت أنه مش هيتغير وهيفضل زى ما هو للأبد لأن الطبع ده اتغلب عليه، ومش عاوز يطلقنى مش موجود عندى حل غير اللجوء لمحكمة الأسرة لاستحالة العيش معه، ورفعت دعوى خلع ضده، ومازالت منظورة فى المحكمة ولم يتم الفصل فيها حتى الآن".